Ulfa (Independent)-i Hindi oshi jembir ka den jala tepset

Guwahati, July 15 (Agencies) : Yimjung olemtep nung madenba Ulfa (Independent) teloki Assam nung Hindi oshi jembir shishilembar ka den par jala tepset.
Arunachal Pradesh den arrtsüa aliba Tinsukia district kübok Pangeri tesem nung Mongulbar nikongtsütsü iba lendong atalok.
Iba mapang shishilembar Nandalal Shah atanga asü aser par jala Kajol mozüki dangi anir aodang len tom nung asü. Ano Shah kinüngtsü aser jabaso ana kanga mejungi yirur Assam Medical College Hospital nung anepaludar.
Motorcycle ka nung nisung asem mener Bijulibon tesem nung Shah’er kidangi aru aser par kidang injang khaloktsü, ta police-i ashi.
“Iba ya Ulfa (I) ajanga inyakba mapa lir. Taoba Honibarnü union home minister Rajnath Singh Guwahati-i arudang Ulfa (I)-i sepaitem dak injang khaloktsütsü merang saka tamakok angu. Onoki osang kar angazükba agi Hindi oshi jembir mashi ka dak injang khalokjang ta Ulfa (I) lennirtemi tetuyuba agütsü” ta Assam nung Additional director general of police (special branch), Pallab Bhattacharya-i osangbenertem dang ashi.