ULFA lenir Anup Chetia Guwahati-i anir aruogo

Guwahati, November 18 (Agencies): ULFA General Secretary, Anup Chetia shiba CBI ket nung liasü pa Bodhbar nü Border Security Force(BSF) indang tayimtsü ka ajanga New Delhi nungi Guwahati tashi anir aruogo.
Arishi küm 48 tain ULFA lenir küm 17 sülen Assam-i anir aruogo. Pa Guwahati tongli LGBI airport nungi indangindanga CBI indang Special Court-i anir oa, iba sülen Chief Judicial Magistrate Court-i anir oa liasü.
Chetia ya 1997 küm nungi Bangladesh ket nung liasü aser taküm November 11 nü Bangladesh sorkari pa India sorkar ket nung agütsüba sülen CBI-i apu.
Anup Chetia den ULFA lenir ana- Lakhiprasad Goswami aser Babul Goswami nata tepouktak nungi Guwahati-i anir aruogo.
Taoba mapang Anup Chetia den külemi inyaker aika tangbo India sorkar den yimjung ken o jembidar. Parnok rongnung ULFA Foreign Secretary, Sasha Choudhury, Raju Boruah nunger Pradeep Gogoi lir aser parnoka court telungtet nung nguogo ajisüaka Anup Chetia ajurutsü atemabo parnok nem temelaba magütsü.
Anup Chetia kinüngtsü Manika Boruah Chetia aser jabaso Sagar Boruah nata court telung nung liasü.
Anup kinungtsüi, “Mapang talangka lir sülen pa anguba atema kanga pelar. Ozüng ajanga latettsü, anungji tangbo ni kecha mejembitettsü. Ajisüaka atangji, tanü ozü jabaso künapronglai pa anguba atema kangasa pelar,” ta ashi.
Osang ajanga ashiba agi, Chetia maneni anogo 8 CBI ket nung agütsütsü. Assam police aser CBI napronglai Chief Judicial Magistrate Sangeeta Haloi court dang Chetia dang ken o aika nung asüngdangyatsü atema meshia liasü.
Osangbenertem den jembidang taoba mapang ULFA lenir Pradeep Gogoi-i, “Mapang talangka lir pa anguba atema onok pelar. India sorkar den tang yimjung ken o tejembitak atema onoki Anup Chetia nüngdaker. Onoki state sorkar aser Centre sorkar naprongla dang telatetba tajung ka dangi arutsü atema yimjung ken o nung adentsü pa nem temelaba agüjang ta mepishitsü. Yimjung atema sorkari agitsü shilem tulu lir,” ta ashi.