ULFA lenir Chetia yimjung ken o nung shilem agidaktsütsüla: Gogoi

Guwahati, November 25 (Agencies): Tanü Bodhbar nü Assam Chief Minister, Tarun Gogoi-i Centre sorkar dang, ULFA telok den tang tejembitak yimjung ken o nung ULFA lenir Anup Chetia shilem agidaksütsüla, ta mepishiogo.
Chetai ya tawa ang Bangladesh sorkari India ket nung agüja liasü.
Mongolbar nü United Liberation Front of Asom (ULFA) ken o jembiba telok nungi teshimtet telok ka Centre sorkar den ken o jembia liasü aser iba mapang nung parnoki Centre sorkar dang taküm December ita taruba ken o jembiba nungbo Chetia-a shilem agidaktsütsü mepishiba sülen anogo ka lir tanü Gogoi-ia kasaji sorkar dang mepishiogo.
Bodhbar nü sangdong ka ajanga Gogoi-i, “Centre den state sorkaria ULFA general secretary Anup Chetia linüki anir arutsü atema inyaktepa liasü. Tang pa anir arur asünungji Centre sorkar aser ken o jembiba telok na tsüngda ken o jembiba nungji Chetia dendaktsütsüla,” ta ashi.
“Yimjung ken o jembiba nung Chetia ji tongtibang nisung ka aser yimjung maparen nung pai shilem tulu ka agitettsü ta state sorkari amanger,” ta Assam chief minister-isa ashi.
Küm 20 shi bendanglen lir state nung mezüng aonung Guwahati Central Jail nung ayipba sülen Anup Chetia-i, pai sorkar anema apusoba anogotem toktsüogo, ta ashi.
Mongolbar nü Chetia’er medemer aser kinüngertem aika pa ajurutsü atema adenshia liasü.
Pa kinüngtsü Monica-i pa ajuruba sülen lai, “Pai (Chetia) raraba lenmangi meyipa maotsü ta shiogo. Iba movement ajunga atema tajungtiba latettsü asoshi pai democratic inyakyim shimtsü ta shiogo. Pa tetsü tasolii meyipa arutsü melaba atema pai Centre, state aser Bangladesh sorkar dang pelar,” ta ashi.