ULFA tanishir Chetia Guwahati-i anir arutsü

New Delhi/ Guwahati, November 13 (Agencies) : Küm 30 shi tejaklen nisung tepsetba ken o nung Brihostibarnü CBI-i Anup Chetia aija puogo.

“Chetia indang tenüng shitakbaji Golap Baruah lir aser 1988 küm Assam sorkari CBI ket nung nisung tepsetba ken o agütsüba nung ajemdaker pa apu. Onok keti aruba sülen pa okadaki anir oa ken o benok aser idangji pa onok ket nung anogo trok ayutsü temelaba agütsü. Pa Guwahati-i anir aotsü” ta CBI sangdong ka nung metetdaktsü.

Golaghat nung ex-councillor Deboksi Dhar Chaudhury tepsetba ken o atema CBI-i bushisüngdanger. Chaudhury ya August 29, 1986 nü ULFA-i tepset aser iba tasa atongba nung Chetia-ia shilem agi ta tai tonglokja lir.

Ano tanga sangdong ka nung ashiba agi, Ulfa nung founding general secretary Anup Chetia anema Terrorist and Disruptive Activities (Prevention) Act (TADA), 1987 kübok ken o 8 benoka lir.

Pa Assam-i anir aruba sülen item ken o ajak atema okadak angatsü aser iba sülen jiang sorkari pa bail nung chioktsü indang mapa inyaktsü.

Assam kübok Guwahati, Sivasagar, Tinsukia aser tanga tesemtem nung Chetia anema ken o benoka lir.

Chetia’er kibongi advocate Bijon Mahajan nem pa pusema jembitsü atema shimogo.