ULFA teloki lanurtem shimoker: DGP

Tezpur, May 12 (Agencies): Tang ozüng agi anentsür aliba telok, ULFA-I-i Assam tesem balala nungi lanurtem anioker, ta Assam Director General of Police, Mukesh Sahay-i Hokolbarnü ashi.
“Tang tashi ULFA-I ajanga Assam nung tesem balala nungi lanurtem iba telok nung adentsü asoshi shimer aser iba telok Commander-in-Chief, Paresh Baruah-i iba mapa ya Myanmar nungi inyaker,” ta Army 4 Crops Headquarter nung ‘high-level’ mitkartem senden ka amenba sülen osangbenertem den jembidang Mukesh Sahay-i ashi.
Tanga telungpurtem nokdangtsü atema maparen balala inyakba indang jembidang, “National Democratic Front of Bodoland (Songbijit) anema Sonitpur district aser Assam ajunga nung mita bushi tenzükogo,” ta pai shisem.
Ato Kilonser, Narendra Modi taruba ita Assam semdangtsü lir aser iba mapang matong tsüngda state nung telungpurtem merüktettsü maparen tesashiba tenzükogo, ta police ketdangserisa ashi.
“Bangladesh nung Jamatul Mujahaddin telungpur anema mita bushi tenzükba sülen state nung ULFA-I aser NDFB-S ajanga timtem agütsütsü merangtsü. Mitkartemi iba maparen kanga süoki ia repranger, aser hopta ana tsüngda Guwahati telongzük yimdong nung CCTV camera inoktsü,” ta DGP-isa ashi.
Mitkar tashi maitba ajanga May 9-nü Guwahati nung aliba M P Jewellers nungi ashiauer temi hon agi yangluba naro aser azük seret 7 nungi 8 tsüngda auyar ao, ta paisa shisem.
“Sorkar mapa inyakertem nem parnok dang temaba jenjang nung aliba ketdangsertemi timtem agüja aser parnok temeden agientsüra iba tejashi social media nung meprokshii kü nem mesüra DGP nem metetdaktsütsüla,” ta Chief Secretary, V K Pipersenia-i osangbener den jembidang ashi.
May 26, 2017 nü Ato Kilonser, Narendra Modi-i state semdangba mapang telungpurtemi timtem agütsütsü südi ta temolung melemtetba ajanga iba senden ya amen.
Kasa senden nungsa Assam, Arunachal Pradesh aser Nagaland arrtsü ken o atemaa jembiogo, ta ketdangser osang ka ajanga ashi.