ULFA(I)-i anur ka pur aoba sülen sen crore 1 meshir

Guwahati, August 22 (Agencies) : United Liberation Front of Assam(Independent) telungpurtemi Assam nung Bharatiya Janata Party (BJP) lennir Ratnaswer Moran’er jabaso apu, ta osang ka ajanga metetdaktsü.
Tinsukia district panchayat vice-president Ratneshwar’er jabaso Kuldeep Moran ji August 1, 2016 nü Arunachal Pradesh kübok Nampong tesem nung ULFA-I telungpurtemi apu.
Tanü ULFA-i video ka sayuba nung Kuldeep Moran-i pa chioktsü atema mapa inyakang ta mepishia ashiba menüngoka lir.
“Ni ULFA(I)-i apu aser parnoki kü tenük alenbanger tesem balala nung anir senzür. Ni tashimait kümogo aser kü temang mejungi kümogo. Ni injang agi kahsettsü ama tsübua bilemer” ta Kuldeep-i video nung par tsürabur, tebu tanubo Bolin Chetia aser Chief Minister Sarbananda Sonowal nunger dang mepishir.
Kuldeep apuba sülen anogo ka lir, mejangjatetba nisung kati pa tebu dang par jabaso chioktsü atema sen crore 1 agüjang ta takhangba agütsü, ta osang angazüker.
Ano külen, ULFA general secretary-ibo Kuldeep apuba mapa nung par telok maden ta metetdaktsü.
“BJP lennir jabaso apuba nung ULFA kecha shilem mali” ta pai osangbener dang ashi.