ULFA(I)-i apuba tanur kümzüktsü atema mapa inyaker

Guwahati, August 23 (Agencies) : Assam nung BJP lennir ka jabaso Kuldeep Moran kümzüktsü atema Assam Police-i Arunachal Pradesh police dang nungia teyari meshiogo.
August 1, 2016 nü Paresh Barua-i aniba ULFA teloki Arunachal Pradesh nung Kuldeep Moran apu.
“Arunachal Pradesh nung Kuldeep apuba osang angazükli, onoki Changlang district (AP) kübok Nakhung police station nung ken o ka benok” ta Assam Director General of Police, Mukesh Sahay-i ashi.
“Arunachal Pradesh nungi pur ao asünung, onoki par state police teyari ajanga dang mapa inyaktettsü. Parnokia Kuldeep kümzüktsü imlar. Security forces aser intelligence agencies-i pa taküm kümzüktsü alizüng yur mapa inyaker” ta Mukesh Sahay-isa shisem.
ULFA(I)-i ISIS ajanga amshiba yimya nung tangokba video ka TV news channels dangi yok aser iba nung telungpur pungu prangpong amer Kuldeep meketbanger noktaka lir.
“Iba video mesükba ya tang mezüng angu aser video indang kuli bushidar” ta Assam DGP-isa ashi.
Kuldeep ya BJP Tinsukia Zilla Parishad vice-president Lakheswar Moran’er jabaso lir aser video nung pai Assam Chief Minister Sarbanda Sonowal, tebu tanubo & Sadia BJP MLA, Bolin Chetia aser par tsüraburtem dang pa chioktsü atema mapa inyakang ta mepishia ashir.
ULFA(I)-i Kuldeep apu ta tenüng agibaji shitak asü masü, ta osangbenertemi DGP dang asüngdangdang, “Ano kuli tejangja mangu” ta pai langzü.
Upper Assam nung ULFA-I-i ozüng alema mapa inyakba aser züngsem tasen aniokba indang ashidang, “Onok kanga kümdanga lir aser parnok anema mapa inyaker. Telungpur maparen magizüktsü aser tesüiba küm 30 tashi onoki parnok anema rara arur” ta Assam DGP-isa metetdaktsü.
ULFA-I, NSCN-K aser Manipur nungi telungpur telok kari Arunachal Pradesh, Nagaland aser Myanmar nung mapa inyaker, ta paisa shisem.
Kuldeep pur aoertemi tebu tanubo MLA Bolin Chetia dang sen crore ka meshiogo aser yashi Kuldeep tetsüi media ajanga ULFA-I dang lar jabaso chioktsü atema mepishia metetdaktsüogo.
Yashi ULFA-I-i pa dangi phone nung Kuldeep chioktsü atema sen meshi, ta tanü Chetia-ia osangbener dang ashi.
Parnoki meshiba sen agütsütsüji tamakoktsü aser ano tashiyim agi sen meshiba agütsütsübaji pai magizüker, ta paisa shisem.