ULFA(I)-i Assam nung Ramdev’er ashram lapokba magizüker

Guwahati, May 23 (Agencies) : Yoga tesayur Ramdev-i Bodoland tesem nung Patanjali Ashram ka lapoktsü sentongji Assam nung Hindutva aser RSS tera ayangtsü atema lir, ta Hombarnü ULFA(I)-i sangdong ka nung metetdaktsü.
Assam kübok Bodo tesem nung Patanjali Trust nem ali acre 3800 agütsütsü sentong atongbaji kanga junga meshisadangi inyakba mapa ka lir, ta ULFA(I) ‘chairman’ Dr Abhijit Asom-i yokba sangdong nung shia lir.
Ramdev-i pa indang ayurvedic mozütem shishilembabaren ulutsüba aser Assam nunger sen bener aotsü atema iba tasa atonga inyaker ta ULFA(I) lennirisa metetdaktsü.
Ajisüaka, parnok indang nükjidong shitakbajibo Assam nung RSS aser parnok indang Hindutva tesayuba tera ayangtsü atema lir, saka Bodoland Territorial Council (BTC) tanishir Hagrama Mohilary-i Ramdev indang tasa mangateti parnok nem ali agütsür, ta Dr Abhijit Asom-isa ashi.
Tanga tashitemi Assam nung arua mapa inyaktsü merangba magizüktsü aser Assam nungertema iba ama tasa nungi kümdanga alitsü ayongzüker, ta ULFA(I) sangdong nungsa metetdaktsü.