ULFA(I)-i BJP candidate maneni amokmerener

Guwahati, April 01 (Agencies): Tanü ULFA(I) teloki maneni Margherita constituency nungi BJP candidate, Bhaskar Sharma amokmeren aser vote agütsürtem dang ‘miima nisung tepsetba commander’ nem vote magütsütsüla, ta metetdaktsü.
Media dangi email ajanga yokba sangdong nung ULFA(I)-i, Margherita nung Sharma candidate ka ama shimba ya constituency mezüngmeshiba lir aser iba ama nisung tamajung ka meshimtsüla, ta ashi.
Par telokisa, Sharma ya ozüng alema nisung tepsetba commander lir, kong tejak nembangba nisungtemi state nung ULFA lenirtem kinüngertem tepseter, ta tai tongloktsür.
Margherita constituency nungi Sharma toktepdaktsüba atema tamalena ULFA(I)-i BJP anema jembia liasü.
Par teloki BJP chief minister candidate aser Union minister, Sarbananda Sonowal den BJP lenir, Dr Himanta Biswa Sharma dang, state nung lanur lenirtem tepsetba nung shilem agiba atema tasüngdangba kaogo.
Tawa parnoki BJP nem tasüngdangba tenet agütsü, item tasüngdangba rongnung ULFA lenirtem samaba aser ‘miima tepsetba’ ken o nung party tangatetba asüngdangba densema lir.