ULFA(I)-i yimjung ken o nung adentsüa akok: Baruah

Guwahati, November 18 (Agencies): Yimjung olemtep nung madenba ULFA (Independent) Commander-in-Chief, Paresh Baruah-i, akhümtsübua jaokra par teloki yimjung ken o jembiba nung adentsü akok, ajisüaka Assam nüjiso onük tongtibangba nungi parnoki masetshitsü, ta tanü ashi.
Mapang ka nungbo külem inyaker Anup Chetia ken o jembiba nung dendaktsütsü dak sentakba nung Baruah-i, “Pa jaokbaji tangatetba nung ajemdaker süra, aser sadoka shisadangtettsüsa pa jail nungi talenba salara takoktsü lir,” ta ashi.
Local TV osang channel kar den jembidang Baruah-i, “Ken o jembiba nung shilem magitsü ta onoki mejembi. Akhümtsübua tim agi jaokra onoki arutsü. Ajisüaka onok mezüng noktaka aliba nungi masetshitsü, kechiyong onok atema tongtibangtiba onük ka (Assam nüjiso) dang lir,” ta ashi.
“Onok indang tongtibangtiba onük nungi onok marakzütettsü kechiyong tenla aika densema lir… nisung 15,000 süogo. Tasodang nungi ozü temeten lir. Ozü züngsem aika taküm tenla agüja süogo anungji süoki ia magiibo ken o mejembitettsü,” ta paisa ashi.
Chetia Bangladesh nungi India-i anir aruba ajanga pa takhangbaji tashimeiti akümtsü asü ta asüngdangba langzüdang pai, “Iba tentet nung ni mesüra Anup Chetia alibaji mezüngshir. Ibaji ajanga tentet tashi meitdaktsür masü. Ni mesüra pa liaka meliaka meyipshishiji maneni alitsü. Iba ya tangatetba tamentaktak ajanga inyaker,” ta ashi.
Yimjung ken o nung Chetia adentsü takoktsü lenmang lir asü, ta asüngdangba langzüdang pai, “Iba nungji ni kecha melangzütsü,” ta ashi.
“Bangladesh jail nung küm 18 aliba sülen maneni pa India jail nung alitsüsa kümra ibaji pa aser Assam nübur atema tia maka asütsü,” ta Baruah-isa ashi.
“Anup Chetia-i ULFA atema inyakba mapatemji onoki mamatettsü aser iba atemaji ni pa akhümtsübur. Pa taküm anema alitsü aser tepoukdak nungi chioktsü ni sarasademtsür,” ta paisa shisem.