ULFA(I) puri Ravi Shankar dangi shidi zülu

Guwahati, September 8 (Agencies): Assam nung telungpur telok ULFA (I) puri India nunger tamangba yimsü ren nung lenir Ravi Shankar dang shidi ka ajanga pai September ti nü osangbenertem den jembidang jembiba onük anema züluogo. ULFA(I) puri pa dang pa teyazü tamangba yimsü nung dang temolung agüja inyakang aser parnok nüjiso bushiba maparen maneni inyakti, ta ashi.
Parnok indang sangdong nung yamai züluja liasü: “ULFA (I) puri nai osangbenertem den sensaksemba mapang jembiba onük dak sendakba nung jangjashiner. Mezüngbuba nung Asom nüjiso ya lisopur tem ajak atema tasodang nungi ngur aliba temeden lir. Nai jembiba mapang nung ojang ka ajanga onok kanga yirutsüogo. Mezüngbuba nung ‘rehabilitation’ ta asüba ojanga ya kanga taret lir aser ya onok tangatetba anema lir. Onoki ‘rehabilitation’ menungdaker aser India nungeri kangshia onok li amokbanger aliba nungi nüjiso akhangba ya tashidaka masü mesera ozüng alema inyakba maparena masü.”
Kasa sangdong ajanga ashiba agi, India sorkari Assam nüjiso indang süoka jembiti ta mesera parnok yimjung ken o jembishinü kecha nunga shilem agitsü asoshi bilema mali.
“Nai yimjung ken o jembitsü asoshi tanaben mepishiba onoki magizüker onoki ‘revolutionary stream’ nung dang anidaker koba ajanga Asom nüjiso angutsü. Onoki prangbong injang amshia nokdakba nung tebilemtsü kaa nai jembiogo, onoki kar amokmerentsü asoshi masü saka onok kümzüktsü asoshi prangbong shia aru. Onoki prongbong amshia nüjiso memeshira alima aser India sorkari onok memeteti lila. Onoki onok nükjidong matong tashi nokdaktsü aser tenangzükba teyazü kar atema onok dang prangbong tokjang ta yimlibilema masüngdang dak tsüner,” ta ULFA sangdong ajanga metetdaktsü.