Umang festival nung balala sotetba tanurtemi shilem agi

Kohima, March 20 (TYO): Balaka sotetba tanurtem ajungmesotsü atema Bodbarnü Umang Festival – Nagaland ayongzüka amung.
Umang Festival – Nagaland ya North East Zone Cultural Centre (NEZCC)-i Cherry Blossoms Society Kohima den yaritepa ayongzük aser Union Ministry of Culture-i teyari agütsü.
‘Umang’ ta asüba ya ‘teimla’ lir aser Divyang tanurtem ajak iba ama sobaliba sentong nung adenshia shilem agiba ya khenyongi balaka lir, ta Nagaland Governor P B Acharya kinungtsü Kavita Acharya-i o jembidang ashi.
Iba sentong nung la tongti tesemdanger liasü aser lai ashiba agi “tanur shia ya Tsüngremi yangluba naro ka ka lir aser meimchir ka ama liyonga aitsü shilem lemzüka lir. nenoki meranga aser nendaka inyakba akanga nenok taküm jenjang tajungba akümtsü aser ajak nem tepela agütsütsü.”
Umang Festival ya balaka soteter nem maongka agütsüba mapa tajung ka lir, ta Kavita-isa shisem
Sentong nung Social Welfare Joint Director, Atoli Sema-ia o jembidang sorkari balaka sotetba tanurtem ajungkettsü atema alizüng yur mapa inyaker ta ashi.
India sorkari Right to Disability Act 2016 yanglu aser job reservation inyakyim tenzüktsüogo, ta laisa ashi.
Iba sentong nung Bumble Bee Inclusive School, Cherry Blossom School, G Rio School, Jo Foundation aser Tabitha Enabling Academy nungi balaka sotetba tanurtemi shilem balala agi.