Umar Akmal nem tenokdangba agütsü

Karachi, Tsüklai/February 20 (Agencies): Umar Akmal nem Brehostibarnü Pakistan Cricket Board (PCB)-i tenokdangba agütsüogo. Spot-fixing asoshi pa den tongtepratepa osang pai magütsü ta shia anti-corruption dak sendakba nung ken o bushitsüngdang bangdaker liasü.
Ajisüaka PCB-i, Akmal nem tenokdangba agütsüba osang tejangja magütsü.
“Pakistan Cricket Board-i tanü Umar Akmal nem tenokdangba agütsüogo. PCB Anti-Corruption Unit-i ken o bushitsüngdangba mapang pa cricket dak sendakba inyakyim kecha nunga shilem magitettsü. Bushitsüngdang tang tesüdak asünung PCB-i iba dak alaka osang tanga magütsütsü,” ta Board sangdong ka ajanga metetdaktsü.
Board nung tongtibang ketdangser kati ashiba agi, Pakistan Super League (PSL) nung spot-fix asütsü asoshi Akmal den tongtepretepba pai osang magütsüba kuli Anti-Corruption Unit ket nung lir.
“Pakistan nunger kati Umar nem iba maongka ya anogo ishika tejakdang agütsü aser temzüng ozüng kübok aliba ama pai Anti-Corruption Unit nem osang magütsü,” ta source-i PTI dang ashi.
“Ano ken o tamajungba küma pai iba nisungba den ajurutep aser ACU-i yashi Umar dang ken o ashishiba mapang tena ajurutepba kuli aser osang belentepba sayua liasü,” ta pai ashi.
Akmal’er PSL team Quetta Gladiators pur Brehostibarnü Islamabad nung mezüngbuba asaya nung asayatsü ghonda ishika lia pa nem tenokdangba agütsü.
“HBL Pakistan Super League 2020 nung Umar Akmal melena asayar ka shimtsü atema apply asütsü asoshi Quetta Gladiators nem temelaba agütsüogo,” ta PCB sangdong ajanga metetdaktsü.
Pa ya taoba Pakistan wicketkeeper-batsman Kamran Akmal, shibai Test 53, T20 58 aser ODI 157 asayaogo pa tenu aser captain Babar Azam indang cousin lir.
Arishi küm 29 tain asayar shiba Pakistan team nung tatemsa October ita asayaogo, pai Test 16, ODI 121 aser T20 84 nung asayaa lir aser pai run 1003, 3194 aser 1690 yanglua lir.
New Zealand nung mezüngbuba Test asayaba mapang century ka yangluba sülen Akmal dak tuluka imlaa liasü saka imlaba ama pai masayatet.
Maneni ketdangsertem den mapang shia mangatettep adokba ajanga pa career nung kongshiogo.
Iba ita tetenzüklen Akmal-i, National Cricket Academy Lahor nung fitness test agiba mapang trainer ka dang o tamajung shiba sülen pa PCB-i tera agi dang tenokdangba magütsü.
Umar nem tenokdangba agütsüba ama Dubai nung 3buba PSL asayaba mapang Pakistan nunger asayar Sharjeel Khan aser Khalid Latif nata tenokdangba agütsür kidangi meyipa yok. Tena Islamabad United franchise nungi asayaa laisü.
Iba sülen Sharjeel küm pongu atema aser Latif küm 10 atema tenokdangba agütsü.
Sharjeel tanaben meyipa arur asayadar aser pa PSL nung Karachi Kings nungi asayatsü.