Umpire dak asaloktsüba atema Shakib dang senchi achi

Luchii/December 19, 2018 (Agencies): Bangladesh cricket team captain Shakib Al Hasan-i West Indies den Sylhet nung mezüngbuba T20I asayaba mapang umpire dak asaloktsüba atema pa indang match fee shilem 15 senchi achi. International Cricket Council (ICC)-ia Bangladesh innings nung over 14buba nung umpire-i wide ka magütsüba atema asaloktsüba asoshi Shakib nem demerit point ka agütsüba jangjatsüogo. 2016 küm nungi tang tashi nung Shakib-i iba la mesükba aibelen ana tashi menaogo, saka ken o angadangtsü kecha nüngdak madoker. Taoba mapang Sri Lanka den T20I asaya ka nung aibelenba atema pa nem demerit point ka agüja liasü.
“Pai umpire dak asaloktsü aser iba sülen mapang talangka sensaksema liasü,” ta ICC-i Sangtennü sangdonga liasü.
“Asaya tembangba sülen Shakib-i pa aibelen nangzükogo aser temerenshi agütsüba agizükogo,” ta kasa sangdong ajanga metetdaktsü.
Iba asaya nung Shakib-i ball 43 nung run 61 yanglutet saka iba ajanga par telok tamakok angutsü nungi mekümzüktet. West Indies team-i Bangladesh pur run 129 nung ajak out sütsü aser wicket ti anunga lia parnoki iba run ya menep.