UN Ambassador Nikki Haley mapa nungi anentsü

Washington, Mongputeni/Oct. 09 (Agencies): US Tir Donald Trump-i UN Ambassador Nikki Haley indang resignation agizükogo.
Mapa tajung inyaka arur küm tatemlen lai iba mapa yutsütsü, ta pai Oval Office nung osangbener dang ashi.
Oval Office nung South Carolina taoba governor dang, pai mapa tanga inyaktsü jaok. “Nai shimtettsü akok,” ta Trump-i ashi.
Haley ya United Nations nung US envoy ka ama Aenjeti/January 2017 nungi inyaka arur.
Haley-i mapa nungi anisüngzük aginür ta küdang ita trok tejakdang shia liasü, ta trump-i ashi.
Tamang makai aliba mapang ka nung lai 2020 nung tir atema metokteptsü aser Trump atema nübu yimtsütsü, ta lai osangbener dang ashi. Trump ya US Tir menden asoshi tanaben tokteptsü osang sangdonga lir.
La ya UN Security Council nung khen atema tir ka ama ita ka inyaker iba osang ya sangdonger.
Haley indang Twitter bio nungibo la US ambassador ama inyakba indang ajunga agienogo.
Rongchii/April nung anojungi Russia nem tenokdangba agütsüba lai sangdong ta Trump den yaritepertemi ashiba sülen la White House den mangatettep adoka liasü.
India nunger immigrant ka jala, Haley-i Trump election nübuyimba mapang pa anema jembia liasü aser iba mapang la South Carolina nung Republican governor ka ama inyaka liasü.
Mapang kabo Trump-i o mükemdangi jembiba ajanga alima rara tenzüktsü, ta lai shia lir.
Nikki Haley tsürabur ya India nunger immigrant lir aser la asodang la nem Nimrata Randhawa ta aja. La ya Bamberg, South Carolina nung Sikh yimsü intet saka Khristan yimsü dangi meyip.
La arishi küm 13 asüdang lar kibong indang süoshi ayokba tesem nung mapa inyaka liasü.
2010 nung la ya South Carolina indang mezüngbuba tetsür aser mezüngbuba kin tila nungi aser linük nung governor tanutsütila aküm. La kasa menden nung 2014 küm tanaben shimtet aser 2016 küm Trump indang cabinet nung meshimok tashi iba mapa ya inyaka liasü.
2015 küm Charleston, South Carolina nung nisung aika khasetba lendong sülen la ya ajaki meteta aküm. Haley ya Army National Guard Captain, Michael Haley den kibong aküm aser tena tanur ana lir.