UN Envoy, Mistura-i Damascus semdanger

Damascus, July 23 (Agencies): Syria nung mangatettep ken o tulu adoka küm 4 shi tongpang kanga sashia raraba anenja par tensa tajungba kümdaktsütsü nükjidong nung United Nations (UN)’er Syria ambassador, Staffan de Mistura-i Damascus tanü Brehostibar nü semdangogo.

Mistura-i tanü Damascus yimti tonga aoba sülen Syria Foreign Minister, Walid Muallem den ajurutepa senden ka mena liasü.

“Syria nung mangatettep adokba teloktemi bendanglen ajurutepa par mangatettepbaren bentettsü asoshi maparen inyakba den sentakba osangtem Mistura-i tanü kü den lemsatepogo,” ta Muallem-i tesülen metetdaktsü.

Mistura-i Syria nung adokba mangatettepbaren bentsütsütsü asoshi inyakba maparen pusema nungitba osanga pai metetdakja liasü.

“Syria-i kiralongrartem meshimeshia samatsütsü aser mangatettep adoka tongpang raraba ajanga mejungi kümdaktsüba rongsenren jenjang tajungba kümdaktsütsüji Syria’er tongti alizüng lir,” ta pai shisem.

Ano, United Nations Security Council (UNSC)-i agiba telemtetbaren mapa küma inyakba ajanga Syria densemba region-i ajurushia aliba kiralongrar den sentakba khuret agientsü asoshi Russia Tir, Vladimir Putin-i benokba onüka pela agizükba olen ka Muallem-i tanü metetdaktsü.

Sweden nunger Mistura-i ayonger külen, Syria sorkar aser sorkar anemba tongti telok nung lenirtemi taoba ita 2 tejaklen nungi tenzüka par mangatettepbaren bentettsü asoshi bendanglen senden ishiben abenba osang jangjaogo.

Syria nung tongpang raraba anenja par linük indang tensa tajungba kümdaktsütsü nükla tulu yur külen, Mistura-i Syria pusemba tongti linüktem, China, Turkey, Jordan, Egypt aser Iran nunger semdanga par lenirtem den Syria den sentakba onük benoka senden amenba osanga bushiteta lir.

Mistura-i Syria sorkar anemer lenirtem den Amman aser Cairo na nunga ajurutepa senden amenba osanga bushiteta lir.

2011 nungi tenzüka Syria Tir, Bashar al-Assad-i aniba Syria sorkar aser sorkar anemertem na tsüngda adokba mangatettepbaren bentettsütsü nükjidong nung UNSC-i Mistura ya Syria Ambassador inyaktsü asoshi küm ka tejaklen shimok.

Mistura jakdang, Kofi Annan aser Lakhdar Brahimi na nem Syria den sentakba khuret bendaktsü saka tenati Syria’er mangatettepbaren mebentettsüteti ambassador menden toktsü.

Syria nung mangatettep adoka tongpang kanga sashia raraba ajanga tanü tashi nung nisung 230,000 dak tema asüba aser Syria’er nütsüng yongsük noklang shilem nung shilem 50 shi pei talidak toktsütsüsa akümba osang bushiteta lir.