UN General Secretary, Ban Ki-moon-i Sri Lanka semdanger

UN Secretary General, Ban Ki-moon (Abelen, 2 buba) aser pa kinüngtsü, Yoo Soon-teak (Abelen) nati Sri Lanka Ato Kilonser, Ranil Wickremesinghe (Achijilen, 2 buba) aser Wickremesinghe kinüngtsü, Maithree Wickremesinghe (Achijilen) na den Sri Lanka yimtiba, Colombo nung ajurutepdang agiba noksa ka yangi angur. (Colombo, September 01)

Colombo, September 01 (Agencies): United Nations (UN) Secretary General, Ban Ki-moon-i Sri Lanka Ato Kilonser, Rnail Wickremesinghe den Sri Lanka yimtiba, Colombo nung yashi, Bodbar nü senden menogo.
Ban-i anogo 3 agia semdangtsü nükjidong nung tang Sri Lanka tonga aoba osang jangjaogo.
Singapore bushia aoba jakdang Wickremesinghe-i UN lenisang den yashi ajurutepa tangar shinga medendaktsüi miim senden ka amenba osang ka Sri Lanka sorkar ketdangsertemi metetdaktsü.
“UN lenisang den tongti senden ka menogo. Tan senden amenba ajanga Sri Lanka sorkari tenzüka aliba terenlok alitsü mapatong ajunga takok ngua mapa küma inyaktsü imlar,” ta Wickremesinghe-i tesülen par Facebook page ajanga  metetdaktsü.
Ban-i tan Sri Lanka semdangdang Sri Lanka Tir, Maithripala Sirisena den ajurutepba den külemi, par Foreign Affairs Minister, Mangala Samaraweera aser Opposition telok lenisang, R. Sampanthan nunger densema, tongti yimsüsür aser lokti tentet lenirtem dena ajuruteptsü sentong renema lir.
Sri Lanka lenirtem den ajurutepa senden amenba sülen Ban-i Jaffna semdanga, Northern Province nung Governor, Reginald Cooray den ajuruteptsü sentong renemba osanga angazükogo.
Ano, Sustainable Development Goals omen nung ajemdaker ayongba lokti senden ka nung Ban-i o jembitsü renema lir.
Ban-i taoba mapang, 2009 küm May ita semdangba sülen küm 7 tashi süidaktsür külen tan mezüngsüa Sri Lanka semdanger lir.
UN lenisang, Ban-i Sri Lanka semdangba sülen G20 Summit senden nung adentsü asoshi China bushia aotsü sentong renemba osanga angazükogo.