UN-i agütsüba o bendang magizüktsü: China

Beijing, May 06 (Agencies): South China Sea (SCS) mangatettep ken o nung United Nations (UN)-i agütsüba o bendang magizüktsü renemba osang ka China-i tanü, Hokolbar nü sangoktsüogo.
China den adokba SCS mangatettep ken o bentettsütsü asoshi Philippines linüki China anema United Nations Security Council (UNSC) nung ken o benoka lir aser iba ken o den sentakba o bendang tan May ita tatembanglen agütsütsü renemba osang angazükogo.
Ajisüaka, China nem yimtenren takoksa bener arutsütsü aser SCS ken o nung par linük aitsütsü nükjidong nung UNSC nung ken o benok ta shia, iba ken o den sentakba o bendang magizüktsü lemtetba osang China-i metetdaktsüogo.
“SCS ken o nung ajemdaker agütsüba o bendang magizüktsü asoshi ozü China-i lemtetogo kechiyong SCS-i ozü China meyong lir,” ta China foreign ministry otongdar, Ouyan Yujing-i nenshia ashi.
SCS tzüyim shilem tuluba ka par meyong lir ta China-i züngshir saka kidangsüa aliba Philippines, Brunei, Vietnam, Malaysia aser Taiwan linüki iba onükji magizüki China den mangatettep ken o benoka lir.