UN-i Aleppo azüngtetba sentong nung vote agiteptsü

United Nations, December 18 (Agencies) : Nüburtem aser sorkar anemer teloktemi Aleppo, Syrian azüngteta yutsüba asadangtsü atema France-i bener aruba resolution nung UN Security Council-i Deobarnnü New York nung vote agiteptsü.
Iba inyakyim ya tang Aleppo anüdoklen nungi nüburtem atsüngienba jangjatsü asoshi UN staff temi nüngdakba mapa ka lir.
Nisung meyirjang aikati tesüiba mapang opposition temi amanglemer aliba tesem toktsüogo.
Ajisüaka tesem azüngteta toktsür aoba maparen toaba Hokolbarnü anenatokogo aser nüburtemi dang telok ajak tsüngda tangatettep kati arutsü atatepdar.
Anüolen aliba linüktemi tesem toktsür aoertem aitsüba anema ola adokogo aser iba ama tensa ka nung international observer temi metoktsüi mita ata nung ajungtsü ama bilemer.
Russia-ibo iba mapa UN-i takok ngua inyaktettsü kangbo meimlar aser observer yoktsü atema hopta aika agitsü ta ashi.
Aji oda süaka France nung bangdakpurtemibo iba tesem nung tang aliba UN züngsemtemi iba mapaji akoktsü amanger.
Iba resolution nung tenokdangba langka tanga arudangtsünungbo majungtsü ta France aser US naprongi Moscow dang shiogo. Damascus aser parnok den zükloka aliba teloktem ajungmesotsü atema France aser US nati UN General Assembly ka ayonga mener.
Syria nung mepetmesü adoker külen tang tashi nung Russia-i trokben tashi parnok tashi amshia Security Council-i iba rara atema inyaktsü aliba sentongtem amajok kümdakja lir.