UN-i alima nung sensakba tia agientsü mapatong benoker

United Nations, September 25 (Agencies): United Nations (UN)-i taruba küm 15 tsüngda nung alima ajunga nung kanga dang sensakba tia agientsü aser alima tsüngsang mupong balaka küma melenshibaren azüoktsü densema alimai ajurushia aliba timtem khuret balala agientsü mapatong ka agizüka kasaji mapa küma inyaktsü onük tanü Hokolbar nü benokogo.
2030 küm matong tashi kümshi dollar sen trillion 5 shi indoka inyaktsü benokba terenlok alitsü mapatong den sentakba onük ya tanü nungi tenzüka anogo 3 agia amentsü ayongba UN senden nung benoka jembitsü renema lir.
Iba senden nung US Tir, Barack Obama aser China Tir, Xi Jinping na den külemi, Egypt, India, Iran, Germany, Britain aser France nungi Tirtemi o jembia shilem agitsü renemogo.
Tan agizüka inyaktsü asoshi benokba onük ya UN senden nung benoktsü asoshi UN nung züngsemba linük 193-i taoba August ita agizüka ayu.
“Tan agizüktsü asoshi benokba mapatong takok ngua inyaktsü asoshi nungdakba sen trillionji ngutetettsü kechiyong iba alizüng ajangzüktsü asoshi UN nung züngsemba linük ajungai kanga mulungsoa agizüka lir,” ta Kenya’er UN ambassador, Macharia Kamau-i tanü metetdaktsü.
Ajisüaka, “Sangküm 2016 küm tashi nung sen trillion ngutettsüsa tang inyakteta mali,” ta shia, tarutsü mapang, 2030 tashi nung nungdakba sen ngutettsü asoshi alima ajunga nung tematiba jenjang nung tentetba UN-i tanü tashi nungdakba maparen inyaka maliba olen ka Microsoft tenzüksang, Bill Gates-i tanü sangoktsü.
“UN-i tarutsü mapang nung bendanga agüja inyakra, iba alizüngji asangsang nung ajangzüktettsü,” ta paisa shisem.
Aji oda, tan senden nung shilem agirtemi pei tebilemba lemsatepa onük jembitepba sülen ‘Transforming our World: The 2030 Agenda for Sustainable Development’ ta ajaba mapatongji agizüka kasaji mapa küma inyaktsü alizüng yua lir.
Iba mapatong kübok tongti alizüng 17 aser item den sentakba alizüng 169 tashi mapa küma inyaktsü benokdanga lir.