UN-i Jordan dang arrtsü lapoktsütsü mepishir

Geneva, Chiteni 03 (Agencies) : Syria anüolentip tsütsü raradak Deraa region nungi jena aotsü merangba Syria nungertem nem arrtsü lapoka yudaktsüner, ta United Nations human rights office aser refugee agency UNHCR ajanga Jordan nungertem dang mepishia metetdaktsüogo.
Taoba hopta ana tsüngda anünglen aser ali nungi amakdang nisung 270,000 shi tesem toktsür jena ao, ta United Nations-i metetdaktsüogo.
“Jordan sorkar dang arrtsü lapoka ayutsü onoki mepishir aser region nung aliba tanga linüktemia jena aoba nüburtem agizükdaktsüner,” ta osangbenertem den jembidang UN human rights spokeswoman, Liz Throssell-i ayongzüka metetdaktsü.
UNHCR spokesman Andre Mahecic-i ashiba agi, Jordan den arrtsü anasa Syria nunger 40,000 shi adenshia lir; par lima nung tenüng züluoka aliba Syria nunger refugee 650,000 jungogo.