UN-i Masood kiralongrar ta sangdongtsü atema benoktsüa akok

New Delhi, March 04 (Agencies): France linüki anir UK aser US nati pusema Masood Azhar ya ‘alima nung kiralongrar’ ta sangdongtsü atema benokogo, aser China linüki menokdangra taruba hopta (March 13 nü) United Nations Security Council (UNSC)-i ibaji agizüktsüa akok.
UNSC sanctions committee Chair-i, March 13, 2019 anogo nikongdang 3:00 ako tashi nung iba temepishiba anema tashishiba ken o marura, ibajibo 1267 ISIL (Da’esh) aser Al-Qaida Sanctions List nung Azhar Masood dendaktsütsü atema züngsem linük shingaia mashishir ta züngshitsü, ta metetdaktsüogo.
Pakistan-i, Pulwama nung CRPF sepaitem amakbaji Azhar-i aniba Jaish-e-Mohammed (JeM) teloki masü, ta shiaka pa 1267 ISIL (Da’esh) aser Al-Qaida Sanctions List nung dendaktsüra ibaji India atema osangtajung ka asutsü.
Pakistan-i parnok sasa Azhar par linük nung lir, ta nangzükogo. ISIL aser Da’esh ya kiralongrar telok ISIS den sendaktepa aliba teloktem lir.
“United States, United Kingdom aser France linüktemi Mohammad Masood Azhar Alvi, ISIL (Da’esh) & Al-Qaida Sanctions List nung dendaktsütsü atema benokogo,” ta sangdong ka ajanga metetdaktsü.
Permanent züngsem Russia-ia ibaji pusemtsü, ta tamalen osang ka ajanga metetdakja liasü. P-3 grouping- US, UK aser France linüktemi Azhar tenüng iba List nung dendaktsütsü atema kulitem committee nem agutsüogo.
P-3-i ashiba agi, “Azhar-i senotsü agi JEM yaria lir. Tamalen pa kiralongrar telok Harkat-ul-Mujahideen, aka Harkat-ul-Ansar nung lenir liasü. Item telok nung züngsem aika Azhar leniba nung JEM nung aden. 2008 küm JeM posters nung Azhar-i Afghanistan nung anüdoklen linüktem nungi sepaitem den raratsü atema nübo ayongdena liasü.”
Parnoki agutsüba kuli rongnung JeM leniba nung Pulwama amakba shia lir. Ajisüaka Azhar iba List nung adentsü atema China-i nokdangtsü aser menokdangtsüar ashitsü makok, kechiyong 2010 küm nungi China-i ibaji nokdanga arudar.
Ajisüaka tangbo China-i menokdangtsüa akok, kechiyong US aser Russia napronglai China dang mepishiogo.