UN-i nuclear tongpang osettsüset nokdangtsü onük agizük

New York, October 28 (Agencies): United Nations (UN) nung züngsemba linüktemi tongpang nung amshitsü nuclear osettsüset yangluba aser kasaji rizüngba mapatong nokdangtsü onük yashi, Brehostibar nü agizükogo.
Tongpang nung amshitsü nuclear osettsüset yanglua kasaji rizüngba linüktemi anem aka, UN Disarmanent & International Security Committee (UNDISC)-i nuclear osettsüset yangluba aser kasaji rizüngba mapatong nokdangtsü onük agizüka liasü.
“Tan nuclear tongpang oset nokdangtsü onük agizükba ajanga alima ajunga nung nuclear tongpang osettüset tangtangbo menokdangtsü. Ajisüaka, alima ajunga nung tongpang osettsüset tesashi yanglua rizüngba maparen azüoktsü nükjidong nung tan nuclear tongpang osettsüset nokdangtsü onükji agizüka ayur,” ta International Campaign to Abolish Nuclear Weapons nung Executive Director, Beatriz Fihn-i yashi senden nung metetdaktsü.
“Nuclear tongpang osettsüset yanglua rizüngba linüktem dang par nuclear mapatong anentsü angatetdaktsütsüji kanga tasak asütsü saka tan nuclear tongang osettsüset nokdangtsü onük agizükba ya alima tensa tajungba kümdaktsütsü nung otsüsütsü mera ka agir lir,” ta lai shisem.
Australia, Brazil, Ireland, Nigeria, Mexico aser South Africa linüktemi aroki lungjemer benokba onükji UN nung züngsemba linük 123 nungi linük 38 nungi lenirtemi agizükba; China, India aser Pakistan densema, linük 16-i shilem magiba aser US, Israel, France, Russia aser Britain densema, tanüngba nuclear mapatong inyakba linük lenirtemi magizükba osang jangjaogo.
Tan agizükba onükji ozüng küma benshitsü atema taküm December ita amentsü renemba UN General Assembly (UNGA) senden nung benoktsü renemogo.