UN-i SCS ken o nung agütsüba o bendang magizüktsü: China

Beijing, July 14 (Agencies): United Nations (UN)-i agütsüba South China Sea (SCS) mangatettep ken o den sentakba o bendang magizüktsü ta China-i tanü Mongolbar nü metetdaktsüogo.

Philippines-i SCS ken o bentetja o bendang agütsütsü onük UN den benok saka UN-i SCS ken o angadangba sentong nung par China medensem aser iba yongji par China-i UN-i agütsüba o bendang magizüktsü lemtet ta China Foreign Ministry otongdar, Hua Chunying-i ashi.

“Philippines kijai SCS den sentakba mangatettep ken o UN nung benokbaren magizüktsü ta ozü China-i taoba mapang nungi metetdakja aruogo aser kasaji tanüa ozü sorkari magizüker,” ta pai metetdaktsü.

SCS ken o benoka maliba linük mesüra tentet kati agütsüba o bendang mesüra ken o bentettsü tasatem China-i kodanga magizüktsü ta pai nenshia ashi.

Philippines-i China den adokba SCS ken o bentettsütsü onük UN nung 2013 küm tetenzüklen benok aser UN-i taoba hopta nungi tenzüka SCS mangatetep ken o angadangtsü tenzüka kasaji yashi Hombar nü tembangba osang jangjaogo.

“China-i tetsü tebou mapang nungi tenzüka SCS nung densema tzü aser tzü telung nungi ngutetba rongsen ajunga par meyong süa aru ta jembiba onük magizüker,” ta shia, United Nations Convention on the Law of the Sea (UNCLOS) ozüng kübok China den adokba ken o bentettsütsü onük Philippines-i benoka liasü.

SCS ajunga par meyong ta China-i züngshiba onükji Philippines den külemi, Vietnam, Malaysia, Brunei aser Taiwan linüktemia magizüki lir.

“Piesasa pei madak yimsüsü asütsü aser tzüyim den sentakba temeten amala mangatettepbaren adokba linüktem tsüngda dang ken o jembiteptsü,” ta shia, China-i UN nung benokba ken o angadangba sentong nung shilem magitsü osang taoba mapang metetdakja liasü.

Ano külen, par linük ana tsüngda mangatetep ken o ji benoka jembiteptsü asoshi China-i Philippines den senden amentsü ayonga lir.