UN lenisang, Ban-i Belgium, Russia & Greece semdangtsü

United Nations, June 10 (Agencies): United Nations (UN) Secretary General, Ban Ki-moon-i Belgium, Russia aser Greece linüktem semdangtsü sentong renemba osang ka UN otongdar, Stephane Dujarric-i metetdaktsüogo.

Belgium yimtiba, Brussels nung ayongba European Development Days sentong nung shilem agitsü asoshi Ban-i tan June ita 13 nü UN tesepti, New York toktsütsü aser iba sentong nung adenba sülen maneni Russia aser Greece na semdangtsü sentong renemer lir.

“Ozü lenisang, Ban-i Brussels yimti nung European Council Tir, Donald Tusk; European Commission Tir, Jean-Claude Juncker aser tongti European Union (EU) lenirtem den ajuruteptsü sentong lir,” ta Dujarric-i osang jangjashitsü.

“Ban-i tan Belgium semdangdang idakji amentsü ayongba Sustainable Energy For All (SE4ALL) mapatong kübok Advisory Board senden nung shilem agia, UN Sustainable Development Goals Ambassadors 17 rong nung densemer, Belgium chuba, King Philippe aser chubatsür, Queen Mathilde na dena ajuruteptsü sentong renema lir,” ta pai shisem.

Tesülen, Russia kübok St.Petersburg nung amentsü ayongba St. Petersburg International Economic Forum nung adentsü asoshi Ban-i St. Petersburg yimti bushia tan June 16 nü aotsü.

St. Petersburg mongdang ya Russia Tir, Vladimir Putin-i ayonger kümshi amenba rongsenren aser shishilembatsü onüktem benoka jembiba tongti mongdang ka lir.

Iba mongdang nung Ban-i Putin densema, tongti ketdangsertem den ajuruteptsü sentong lir ta Dujarric-isa ashi.

Ban-i St. Petersburg mongdang nung shilem agiba sülen Greece kübok Athens bushia tan June ita 17 nü ayamesotsü aser Greece Tir, Prokopis Pavlopoulos aser Ato Kilonser, Alexis Tsipras na densema, Greece yimsüsürtem den ajurutepa senden amentsü.

Ano, Ban-i Greece kübok densemba Lesvos asetkonga tan June ita 18 nü semdanga idakji jenoka alir refugee aser migrant nisungtem den külemi, parnok anepalur ketdangsertem den tsüngdong ajurutepba sülen tasüng, June ita 19 nü New York bushia aotsü.