UN lenisang, Ban-i Middle East semdangtsü

United Nations, June 22 (Agencies): United Nations (UN) Secretary General, Ban Ki-moon-i tan Hokolbar nü France linük semdangba sülen Kuwait, Israel, Palestine nunger lushitem aser Jordan linük densema, Middle East semdanga senzütsü sentong renemba osang ka UN otongdar, Stephane Dujarric-i tanü, Bodbar nü metetdaktsüogo.
“Ban-i France tonga aoba sülen France Tir, Francois Hollande aser Foreign Minister, Jean-Marc Ayrault na den Paris nung tan Honibar nü ajuruteptsü sentong renema lir,” ta pai metetdaktsü.
France lenirtem den ajurutepa senden amenba sülen Ban-i Yemen nung mangatettep adokba bentettsütsü asoshi shimba UN’er Yemen envoy, Ismail Ould Cheikh Ahmed aser mangatettep adokba Yemen teloktem den Kuwait nung tan Deobar nü ajuruteptsü ta pai ashi.
Ban-i Kuwait chuba, Sheikh Sabah al-Ahmad al-Sabah aser Kuwait sorkar lenirtem dena ajurutepa senden amentsü sentong lir.
Kuwait semdangba sülen Ban-i maneni Israel semdanga Israel Ato Kilonser, Benjamin Netanyahu aser Tir, Reuven Rivlin na den Jerusalem nung senden ka amenba den külemi, Tel Aviv yimti nung kaketshirtem den senden tanga ka taruba Hombar nü amentsü.
Ban-i taruba Mongolbar nü UN-i Gaza nung ketdang asüba tetsür primary school ka semdangba sülen West Bank kübok Rawabi aser Ramallah na nung Palestine Tir, Mahmud Abbas aser Ato Kilonser, Rami Hamdallah na den senden ka amentsü sentong lir.
Ban-i Middle East semdanga senzüba sülen tan June ita 29 nü UN tesepti, New York tonga arutsü ta Dujarric-isa metetdaktsü.

You must be logged in to post a comment Login