UN lenisang, Ban-i N Korea semdangtsü

Geneva, November 16 (Agencies): North Korea lenisang, Kim Jong-un den ajurutepa senden amentsü nükjidong nung United Nations Secretary General, Ban Ki-moon-i tan hopta tatembanglen N Korea semdangtsü sentong renemba osang ka South Korea sorkari ketdang asüba Yonhap news agency-i metetdaktsüogo.

N Korea nung tentetba inter-Korean factory park semdangtsü asoshi Ban-i ita 6 tejaklen sentong renem saka iba semdangtsü sentongji mapa küma meinyakteti oda süidaktsü.

Ajisüaka, Ban-i tan Pyongyang semdangtsü sentong renemba den sentakba osang jangjashitsütsü asoshi New York yimti nung tentetba UN otongdar office aser Seoul nung tentetba Unification Ministry napronglai memulungba osang angazükogo.

Ban-i tan sentong renemba ama asangsang nung Pyongyang semdangra, pai UN lenisang menden benokba sülen tanü tashi nung tan mezüngsüa Pyongyang semdanger asütsü.

Taoba UN lenisang, Boutros Boutros-Ghali-i 1993 küm Pyongyang semdangba sülenbo tanü tashi nung UN lenisang menden abener kati danga N Korea semdanga mali.

Ano, 2011 küm nungi tenzüka N Korea lenisütsü menden abensang, Kim-i bendang linük Tir ka danga par linük agizüka maliba den külemi, paia bendang linük ka danga semdanga mali.