UN lenisang, Ban-i Western Sahara ken o bentettsütsü meranger

UN lenisang, Ban-i Western Sahara ken o bentettsütsü meranger

Algeria anülulentip tsütsülen, Tindouf kübok Boudjdour nung tenetba refugee camp noksa ka yangi angur. United Nations Secretary General, Ban Ki-moon-i Tindouf region nung tentetba refugee camp-tem tanü, Honibar nü semdanga liasü. (Tindouf, March 05)

Tindouf, March 05 (Agencies): United Nations (UN) Secretary General, Ban Ki-moon-i Algeria anülulentip tsütsülen tentetba Sahrawi refugee camp-tem tanü, Honibar nü semdangba osang jangjaogo.
Africa northwest tsütsülen tentetba Morocco linük sorkar aser Polisario Front (PF) telok na tsüngda adokba Western Sahara den sentakba mangatettep ken o bentettsütsü nükjidong nung Ban-i tan Sahrawi refugee camp-temji semdanger lir.
Morocco-i Western Sahara Spain yimli nungi 1975 küm agiba sülen iba alimangji par Sahrawi meyong ta shia, PF teloki Morocco sorkar den tongpang kanga sashia raratsü tenzük.
Tesülen, UN-i ayonger par telok ana tsüngda 1991 küm yimjung tezüngzüktep agi saka par telok anati iba mangatettep ken o ji mebentetteti tanü tashi benshiba osang bushiteta lir.
Western Sahara nung tongpang kanga sashia raraba ajanga pei talidak melitettsüsa akümba Sahrawi refugee nisungtemi kidangsüa aliba Algeria linük kübok Tindouf nung ajungli agi yangluba ki nung joko küm 40 shi jenoka aliba osanga jangjaogo.
Sahrawi refugee nisungtem par talidaki tanaben shilangdaktsütsü nükjidong nung PF telok aser Morocco sorkar na tsüngda tanaben jembiteptsü senden mena par mangatettep ken o bentettsü ajungshitsü alizüng yur Ban-i tan refugee jenokdak tesemtemji semdang.
“Ajaki agizüktettsü aser ajak ajangzükdaktsütsü tezüngzüktep tajung Western Sahara nung agitsü asoshi ni alizüng yua lir,” ta Ban-i Tindouf nung tentetba refugee camp-tem semdanga PF lenirtem den jaurutepba sülen metetdaktsü.
“Ban-i tan Tindouf semdangba ajanga Morocco den adokba mangatettep ken o benteta ozü Sahrawi kini Western Sahara nung peisasa pei madak yimsü asütsü temeten angutsü maongka tajungba angutsü imlar,” ta PF lenisang, Mohammed Abdelaziz-ia metetdaktsüogo.
Algeria densema, Africa nung tentetba linük ishikati pusemba PF teloki Morocco den adokba mangatettep ken o tekaratiba mapang nung bentetdaktsünüa aliba osanga jangjaogo.
Ajisüaka, phosphates aser totzü o gas na angudak, Western Sahara par yimli kübok dendaktsütsü tangatetba Morocco sorkari ayuba osanga bushiteta lir.

You must be logged in to post a comment Login