UN lenisangi tatemsüa Israel & Palestine lushitem semdang

Jerusalem, June 29 (Agencies): Israel aser Palestine napronglai agizüktettsüsa linük ana tebentetbaren asangsang nung bener arutsütsüsa Israel Ato Kilonser, Benjamin Netanyahu-i inyaktsü tajungshiba olen ka United Nations (UN) Secretary General, Ban Ki-moon-i yashi, Mongolbar nü metetdaktsüogo.
“Yihuda aser Palestine nübur napronglai pei linük aser lushi nung alitsü temeten aliba kuli tejangja lir. Anungji, iba temeten alibaren magizük tashi par linük ana tsüngda adokba mangatettepbaren kodanga mebentettettsü,” ta Ban-i sangoktsü.
Paisa ashiba agi, tashiyim amshiba aser tongpang raraba ajanga par linük ana tsüngda tebentetbaren bener marutsütettsü aser bendangertemia par mangatettep ken o tashiyim agi mebentettsütettsü.
Ajisüaka, Israel aser Palestine lenirtemi tsüngdong ajurutepa kati ka aküm tsüboa lenji oa jembitepba ajanga dang par mangatettep ken o bentettettsü ta pai ashi.
Ban-i tan Israel aser Palestine na semdangdang UN-i Gaza nung tenteta ketdang asüba school ka semdangba den külemi, West Bank kübok Ramallah semdanga Palestine lir, Mahmoud Abbas dena senden  amenba osang angazükogo.
Ban-i UN lenisang ama tan tatemsüa Israel aser Palestine na semdanger lir kechiyong par UN lenisang menden abentsü kümsük taküm December ita 31 nü tembangtsü.