UN nuclear inspector tazüngba Tero-i mapa toktsür

Berlin, Monupii 12 (Agencies) : UN nung nuclear watchdog inspector tazüngbai ajungbena dang pa mapa toktsüogo; Iran nung nuclear tebilemtsü indang agency-i inyakba mapang ka nung tang pai iba menden toktsür.

Kechi kuli ajanga Tero Varjoranta-i ajungbena dang pa mapa toktsüar International Atomic Energy Agency (IAEA)-i mashi; jurila miim o dak sendakba nung parnoki telangzüba magütsür, ta tanü Küptoknü IAEA-isa shiogo.

Varjoranta shibai joko küm pongu shi iba mapa bena liasü, pa melena mapang tatsüka atema Italy nunger nuclear engineer, Massimo Aparo-i iba mapa bena atatsü; agency nungi tang tesüsaba Iran atema inspector tekolakba inyaksangji pa (Aparo) liasü.

Tehran-i inyakba ‘atomic weapons program’ mita reprangtsü nükjidong nung 2015 küm züngzüktepba ‘Iran nuclear accord’ nung United States madentsü ta US Tir, Donald Trump-i sangdongba sülen anogo ishika lir tang Tero Varjoranta-i iba menden toktsür.

Vienna nung amenoka aliba ‘nuclear agency’ ajanga ashiba agi, Iran nungeri iba tezüngzüktepba anema inyakba indangbo tang tashi kecha mali.