UN nung Ambedkar asoba anogomung amungtsü

UN, April 09 (Agencies): Sustainable Development Goals (SDGs) nükjidong ataloktsü atema liromemedemba anema raratsü nung rangloker tang mezüng United Nations (UN) nung India linük Temzüng yanglusang aser Dalit nunger temeten atema inyaksang, B R Ambedkar asoba anogomung amungtsü.
UN nung Permanent Mission of India-i Kalpana Saroj Foundation aser Foundation For Human Horizon den senteper Ambedkar asoba anogo atongtsü anogo ka lia April 13 nü yangi UN Headquarters nung pa asoba 125buba anogomung amungtsü.
Iba anogomung nung ‘Combating inequalities for the achievement of SDGs’ onük nung o lemtep akatsü.
India nungi Permanent Representative to the UN, Syed Akbaruddin-i, “SDGs nükjidong ataloktsü atema inequalities anema raratsü nung rangloker tang mezüng UN nung Babasaheb asoba anogomung amungtsü,” ta metetdaktsü.
Indian mission sangdong ka ajanga, Babasaheb ya India nunger million aika atema ajungmesor ka lir aser kasa temeten atema inyaker ka lir ta alimai züngshir, ta metetdaktsü.
“Iba ya, mapang agi tiatsüba ka süaka, 2030 küm tashi nungbo alima nung sensak tia, aya-tzüra aser loktiliba-rongsenkettsüng nung liromemedemba malitsü atema UN General Assembly-i SDGs benokbaji Babasaheb indang mangdang liasü ta ajaki reprangteter,” ta kasa sangdong ajanga ashi.
Ambedkar ya 1891 küm April 14 nü aso aser pa 1956 küm asüba sülen 1990 küm pa nem India nunger tematiba civilian award ‘Bharat Ratna’ agütsü.