UN nung India tsür ka den jabaso tepset

New Delhi, March 24 (Agencies): United States (US) nung India tsür software professional ka aser la jabaso ka tepsetogo, ta tanü asür kinüngertemi metetdaktsü.
Andhra Pradesh nung aliba kinüngertemi, arishi küm 40, N Sasikala aser lar jabaso arishi küm tenet, Anish Sai na New Jersey nung aliba kidang tepseter lia angu, ta ashi.
Brishotibar aonung Sasikala kinüngbu aser software professional, N Hanumantha Rao nikongdang par kidangi arudang tasümang anaji angu.
Osang ka ajanga ashiba agi, Andhra Pradesh MLA, Y Sambasiva Rao-i phone ajanga Telugu Association of North America (TANA) züngsemtem den iba tatalokba indang jembiogo. Iba sülen Rao-i, tetsü aser jabaso naji lisü agi alenseta tepset, ta ashi.
Par kibongji US nung taoba küm 9 tashi alir aser Sasikala-i kidang nungi dang office mapa inyaka liasü.
Iba tatalokba aija Andhra Pradesh Chief Minister, N Chandrababu Naidu-i twitter ajanga, “New Jersey, US nung Sasikala aser jabaso Sai tepsetba osang angashia jashir. Kibong züngsemtem den ni asüku lemsateper,” ta ashi.
Telugu Desam Party General Secretary aser MLC, Nara Lokesh-ia, “New Jersey, US nung Sasikala den lar jabaso tepsetba osang angashia jashir. Item ama atalokbaji sashia aitsür,” ta ashi.
Tawa US nung aliba India nunger anema inyakba kanga buloa kümdar.
Taküm February ita nung Kansas, US nung India nunger arishi küm 32 tain, IT professional Srinivas Kuchibhotla aser par medemer ka na dak nisung ka tenüng agi Adam Purinton-i injang khaloktsü. Kuchibhotla ya Telangana nungi liasü aser Purinton-i pa dang ‘ner linüki meyipa oang’ ta asaloktsüba sülen injang khalokja liasü.
Ano tan ita tetenzüklena India nunger store kibur ka South Carolina nung khaset, iba sülen anogo ana lir Kent, Washington nunga India nunger (Sikh) kata injang agi yiruja liasü.