UN nung India, US, Afghan-i kiralongra atema Pak anema jembi

New Delhi/UN, Aenjeti 20 (Agencies): UN Security Council nung India-i, Pakistan-i kiralongrar tajung aser tamajung ta bendangba tangatetba melenshitsüla, ta metetdaktsü.
India-isa, kiralongrartem jenokdakja arrtsü adener tangalen kiralongraba atema tebilemtsü kaa jembi.
Indian Ambassador to the UN, Syed Akbaruddin-i UN Security Council dang, India-i Afghanistan tanaben yangertettsü atema nükjidong yur inyaker, ta ashi.
Paisa, New Delhi-i maneni regional aser international partners den külemi Afghanistan nung yimjung, tesünep aser azükaru atema inyaker, ta ashi.
Iba jakdang US-i UN Security Council dang, Pakistan linük nung kiralongrartem jenokdaksüba ya tagizüktettsüla masü, ta ashi.
US-i, Pakistan nung kiralongrartem maneni jenokdaktsüba ya magizüktettsüla, ta shia Pakistan dang iba dak sendakba nung bangzüng ka renemtsü metetdaktsü.
Minister tem senden nung US deputy secretary of State, John Sullivan-i, “Onoki Pakistan den külemi inyakner, ajisüaka parnoki kiralongrartem jenokdaktsüra ibaji tamakoktsü. Pei linük arrtsülen kiralongrar telok balala maneni jenokdaktsüba linükji den inyaktsüji tasak asütsü,” ta ashi.
Ano Afghan deputy foreign minister, Hekmat Khalil Karzai-ia par arrtsülen (Pakistan den) kiralongrartem jenokdaktsüba tesem aliba indang metetdaktsü.
Ajisüaka Pakistan-ibo ibaji magizükteter.
Indian Ambassador-i jembiba o langzüka Permanent Representative of Pakistan to the UN, Maleeha Lodhi-i Jadhav indang onük benoka liasü; Jadhav ya yaküm March ita nung Pakistan nung apu aser Pakistan military court kati pa ya itangiter ka lir ta aija tasüba temerenshi agütsütsü obendang agüja liasü.
“Tangatetba melenshitsü atema jembirtemi (India) pei tama meyipa reprangshitsüla, kechiyong ozü linük anema India nunger itangiter ka apuba ajanga kuli sayur,” ta lai UN Security Council züngsemtem dang metetdaktsü.