UN nung Pak-i Kashmir tetshira India-ia meyiptsütsü

New Delhi/New York, September 25 (Agencies): Brihostibar aonung tesü India-i, Pakistan Ato kilonser Nawaz Sharif-i UN general assembly nung Kashmir onük süoka jembira ibaji India-ia meyiptsütsü, ta ashi.
New York nung osangbenertemi, UN general assembly nung Pakistan Ato kilonseri Kashmir onük süoka jembira India-i kechi inyaktsü ta asüngdangba langzüdang India external affairs ministry otongdar Vikas Swarup-i, “Pa dang nungi sangdong ka (Kashmir onük) arura, onoki ibaji meyiptsütsü,” ta ashi.
Tamalen Pakistan yimtiba, Islamabad nung Pakistan ketdangser kati, Sharif-i Kashmir onükji tongtibang süa agir aser UN General Assembly nung pai ibaji benoka jembitsü akok, ta metetdakja liasü.
Pakistan ketdangserisa, ajisüaka Pakistan Ato kilonseri arrtsülen Line of Control (LoC) nung yimjung alitsü atema mera aika benoktsü, ta ashi.
Sharif-i September 30 nü general assembly nung jembitsü sentong lir.
Yaküm küma UN nung Sharif-i Kashmir onük süoka jembiba sülen India Ato kilonser Modi-i UN secretary general Ban Ki-moon dang, ajungbena linük ana tsüngda onük benokba ajanga ibaji bentettsü makoktsü, ta shia liasü.