UN nung Pope Francis-i tashi aser rongsen arishiba sashia aitsü

United Nations, September 25 (Agencies): Hokolbar nü United Nations nung alima lenirtem adenshia alidak Pope Francis-i tashi aser alimar rongsen arishiba sashia aija, merumeruba ajanga alimar rongsen samatsür aser sensak tia tamajungba kümdaktsür, ta sangoktsüogo.
Tanü New York nung UN General Assembly nung jembidang Pope-i, “Tashi aser alima rongsen merumerua arishiba ajanga alimar rongsen tim mesüi amshiba den külemi maongka mangurtem aser sensakertem sentoker,” ta ashi.
Alima nung Catholic billion 1.2 madak tamangba yimsü lenir Pope Francis-i rongsenkettsüng aser loktiliba sentokba dak sentakba temenentem sashia aitsüogo.
Paisa, “iba amai atangji nung atalokba tensa ajanga kü khuret tulu aliba angateta iba atema jembitsü atema ni Khristan nübur ajak aser tangartem den longjemdaktsütsü,” ta ashi.
Latin America nungi mezüng Pope Francis-i küm ana yimsüsüba tashi abendang, alima nung tazüokba kecha makai nijai rongsenkettsüng atema inyakba inyakyim aija aruogo.
Taküm United Nations General Assembly küm 70 ajungba mung amunger aser taküm alima lenirtem timtiba adenshitak Pope-i iba tayongzükba agütsüogo.
Arishi küm 78 Francis-isa alima yimsüsürtem dang nisung shibelenba anema raratsü, tetsürtem shisaliok jenjang tajungba kümtsütsü aser süngdonglidong-shiruru kümzüka ayutsü atema tayongzükba agütsüogo.
Sept. 11, 2001 küm Islamic telungpurtemi World Trade Center poksaja nisung 3000 jungnüa tepsetba tesem nung Hokolbar aonung Pope lenisüba nung tamangba yimsü ajak nungi sarasadem sentong ka agiogo.