UN nung US Drone ken o benoktsü: Pak

Islamabad, June 09 (Agencies): US-i Pakistan lushi telung nung par nisung memeni yimdaktsüba drone tayimtsü amshiba ken o United Nations (UN) nung benoktsü sentong renemba osang ka Pakistan Foreign Affairs Advisor, Sartaj Aziz-i tanü, Brehostibar nü metetdaktsüogo.

Pakistan-i ayonger külen kidangsüa, Afghanistan nung tentetba Taliban telungpur telok aser Afghanistan sorkar na tsüngda yimjung senden amentsü sentong renemba mapang ka nung US mitkartemi par drone tayimtsü amshia Afghan Taliban telok lenisang, Mullah Akhtar Mansoor tepsetba ajanga iba yimjung sentongji takok ngua mayongteti süidaktsütsüsa aküm.

US mitkartemi par drone tayimtsü amshia, Mansoor taoba May ita 21 nü Balochistan province nung tepseta liasü.

“US-i par drone amshia tawa Balochistan nung Mansoor tepsetba ajanga par linüki ozü Pakistan’er peisasa pei madak yimsü asütsü temten anema inyak, yimjung senden mayongtettsüsa aküm aser Afghanistan nung taoba mapang nungi tang lendong tesashiba ataloktsütsü tenzükogo,” ta shia, US-i drone amshiba ken o UN Human Rights Council nung benoktsü sentong renemba olenji Aziz-i nenshia metetdaktsü.