UN Secretary General atema Antonio Guterres shimogo

New York,  October 06 (Agencies): Alima tensa tamajungdang taoba mapang Portugal Ato kilonser, arishi küm 67, Antonio Manuel de Oliveira Guterres-i UN Secretary General mapa agizüktsü.
Guterres ya taoba mapang UN High Commissioner for Refugees liasü.
Alima nung tashi tulu aketba linük ana- US aser Russia na tesentaktep mejungi aliba mapang ka, Syria nung rara den külemi alima nung kiralongraba aser refugees tebilemtsü tulu aliba mapang ka nung pai UN tongti 9 buba mapa agizüktsü.
Guterres-i, “Yimjung atema asenoki yimtenren jenjang tajungba akumtsü nüngdaker. Alima linüktemi timtem nokdangba dang nungibo timtem anepaluba nung mapang aser senotsü timba intoker,” ta ashi.
“Secretary General kati maneni rara ajema akumtsü aser nisung asüba ajema akumtsü atema inyaktsüla,” ta paisa metetdaktsü.
Guterres ya aikati sapur aser pai o tsüngrosonga jembiba den külemi meimchirtem temeten atema odiodia jembir.
Refugees tebilemtsü mazüokteti akumba mapang ka nung pa UN’s refugee organisation nung tongti inyaka liasü.
Pa ya Portugal yimtiba, Lisbon nung aso aser trained engineer ka ama Assistant Professor inyakba sülen 1974 küm yimtenren nung ajemoka liasü.
Guterres-i par linük nung Socialist Party yangerba nung yariba den külemi democracy atema inyaka liasü.
Guterres-i aniba Socialist Party-i 1995 küm general elections nung takok anguba sülen pa Ato kilonser akum. Iba mapang nung par linük nung temesepba mozü, heroin tebilemtsü tulu liasü.
2002 election nung Socialist Party-i tamakok anguba sülen pa Ato kilonser menden nungi alu aser alima yimtenren nung ajemoka Socialist International nung khenpiga lenir liasü.
Guterres ya Catholic lir aser pa mezüng kinüngtsü 1998 küm cancer tashidak agi asüba sülen tanaben kibong akum.
“Teyari nüngdaka alirtemi teyari peria mangur. Item rongnung tamajungbaji tetsür-tanurtem lir, aser parnokji tongtibangtiba lir. Kodang kari Blue Flag ngudir, pai mesüra lai ‘ni kümzüka lir’ ta shitettsüsa asenoki inyaktsüla,” ta pai ashi.
Sangküm January ita nung pai UN tongti mapa agizüktsü.
UN Secretary General ya shilem ana nung lemsar shimmer- mezüngbuba nung candidate tenüngji Security Council-i benoker, iba sülen  züngsem 193 aliba General Assembly-i tenüngji agizüktsüla.