UN senden amenba jakdang US o Russia nati jurila senden ka amener

Geneva, February 19 (Agencies): United Nations (UN)-i ayonger Switzerland kübok Geneva nung Syria yimjung senden amenba jakdang, US aser Russia’er mitkar lenirtemi tanü, Hokolbar nü ajurutepa jurila senden ka amenba osang ka ketdangsertemi metetdaktsüogo.

“Syria nung tongpang rarabaren anenja par linük nung yimji yimjung lidaktsütsü tasa aser lenmangtem bushitsü mapatong aroki lungjemer inyaktsü nükjidong nung US aser Russia lenirtemi tanü jurila senden menogo,” ta parnoki ashi.

UN’er Syria Envoy, Staffan de Mistura-ia tanü senden nung videolink ajanga shilem agia liasü ta UN otongdar, Michele Zaccheo-i osang jangjashitsü.

Geneva nung amentsü ayongba Syria yimjung senden nung shilem agirtemi par mangatettepba agiena tongpang merarai yimjung nung alitsü yimjung tezüngzüktep zülutepa agitsü teimla Moscow-i ayuba olen ka Russia Deputy Foreign Minister, Mikhail Bogdanov-ia lemsatepa liasü.

Russia-i yaküm, 2015 küm September ita nungi tenzüka par mitkar tayimtsütem yoka Syria Tir, Bashar al-Assad-i aniba mitkartem den yaritepba ajanga Syria sorkar mitkartemi sorkar anemer madak takok angu tenzükba osanga bushiteta lir.

You must be logged in to post a comment Login