UNAIDS-i Designer Cole Goodwill Ambassador shimer

Geneva, June 08 (Agencies): United Nations (UN) AIDS tenteti par international goodwill ambassador inyaktsü atema America nunger süoshi tasen purateta yanglur, Kenneth Cole shimogo.
“Taoba mapang nungi tenzüka, AIDS tashidak den sentakba osangtsüsang prokshir, Cole-i 2030 küm tashi nung alima ajunga nung AIDS tashidak meshimeshia samatsütsü alizüng asangsang nung ajangzüktsüsa tongti shilem agitsü ta pa dak temulung lema, pa UNAIDS’er international goodwill ambassador shimogo,” ta UNAIDS lenisang, Michel Sidibe-i osang jangjashitsü.
1980s mapang nungi tenzüka fashion industry nung HIV/AIDS tashidak adoktsü tenzükba sülen süoshi aser tsüngsem yangluba ajanga nungtugu akümsang, Cole ya HIV/AIDS tashidak indang yimjak nung jembir mezüngpur ka lir.
AIDS tashidak kanga sashia prokshitsü tenzükba sülen Cole-i supermodel – Christie Brinkley aser Beverly Johnson na den nüngtugu nisungtem noksa tangoker, Annie Liebovitz nunger ayonger AIDS tashidak den sentakba research agitsü ayongzüka liasü.
Iba mapangbo AIDS agi shiranger nisungtem lokti tentet nung mezüngoki sendoka liasü aser iba yongji, nungtugu nisungtem aser AIDS tashidak na sentaktepdaktsüba ajanga AIDS tashidak sembabaren agientsü asoshi Cole-i nungdakba maparen inyak.
Cole-i 1987 küm nungi tenzüka amfAR ta ajaba AIDS Research Foundation nung züngsema iba tentet indang mendenbuba inyakba osanga bushiteta lir.
Ano külen, UN Secretary General, Ban Ki-moon-i anir külen alima linük aser tongti tentet lenirtemi HIV/AIDS agi shirangertem den tanü nungi tenzüka anogo 3 tashi UN tesepti nung HIV/AIDS tashidak den sentakba senden amen tenzükogo.