UNC, Centre aser Manipur sorkar tsüngda senden atsülangogo

Imphal (Manipur), July 09 (Agencies): Manipur nung district tasen asem tentetba onük dak sendakba nung telok asem- United Naga Council (UNC), Centre sorkar aser Manipur sorkar tsüngda July 10, 2017 nü Ukhrul nung senden amentsü sentong liasü, ajisüaka iba anogo atsülangogo.
Osang angazükba agi, iba sendenji anogo pezü-pongu sülen amentsü.
Osang angazükba agi, Centre sorkari United Naga Council (UNC) dang, Ministry of Home Affairs (MHA) rongdak nüngdak kar adoker, anungji parnok mazüngtsü ta shia iba senden anogo atsülangtsü atema mepishia liasü.
Ajioda Centre sorkari mepishibaji UNC lenirtemi agizükogo.
Hombarnü tashi nungbo senden anogoji metetdaktsütsü iba den külemi senden agitsü tesema melenshia Ukhrul nung masü saka Senapati district headquarters nung amentsü.
Ano külen tanü, Deobar anepdang 10:30 ako nungi tenzüka Senapati jila nung UNC senden ka menogo.
Tamalen UNC lenirtemi, state nung district tasen asem tentetba onükji sorkari süoki ia magira parnoki longkak tesashiba aittsü ta amokmerena liasü.
UNC lenirtemisa, iba onük ya mapang lateta yur tembanga inyaktsüla, ta takhangba agüja liasü.
UNC lenirtemisa, “Telok asem senden nungji iba onük mejembira onoki onok meyong li kümzüktsü atema kecha marendaki inyaktsü. Naga nunger melung yirutsütsüsa benokbabo onoki magizüktsü,” ta sangdonga liasü.
“Tang Manipur nung N Biren Singh-i aniba sorkar aser Centre nung Narendra Modi-i aniba sorkari onok dang Ibobi Singh’er sorkari adokdaktsüba timtem bentettsütsü ta nangzükogo, anungji onoki ochi obendang yongyaa atar,” ta lenirtemisa metetdaktsü.