UNC-i anogo 14buba Manipur mokdanger

Imphal, November 14 (Agencies): United Naga Council (UNC)-i mapang telatet ka makai Manipur-i aoba National Highways ana mokdang tenzüker tanü agi anogo 14 abensaa state yimtiba nung osettsüset aser aonsotsü jenjang kanga tuogo.
Nagaland tsütsü Mao gate aser Jiribam nung khu abenba truck 1,000 dak tema anendena lir, kechiyong rongsenkettsüng lenmang mokdangba ajanga Imphal-i aoba truck temji state yimtiba-i mouteter, ta police ketdangser kati ashi.
Tang Imphal nung petrol totzü litre ka nung Rs 250 aser Churachandpur o Chandel hill districts nung litre nung Rs 300 agi ayoker, ta parnokisa metetdaktsü.
Item tebilemtsü ajema akümtsü atema security sepaitemi Silchar, Assam nungi trucks aser totzü abenba gari noklang aika meina Jiribam sub-division-i apusogo, ta ketdangserisa ashi.
Ano külen Irom Sharmila-i tang tasen tentetba yimtenren party, People’s Resurgence & Judicial Assurance (PRJA)-i UNC dang ‘humanitarian ground’ nung iba mokdangba agiendaktsüner, ta mepishiogo.
PRJA Convenor, Erendro-i iba mokdang ajanga sensakertem kongshir ta aitsüba den külemi iba tensa ya ajanga state nung Okram Ibobi-i aniba Congress sorkar tashi maitba kuli sayur, ta ashi.
Sorkari Sadar Hills aser Jiribam na nem district bendanga agütsütsü lemtetbaji ajanga Manipur nung Naga nunger indang akhidang nung aliba ali lemdangtsü, ta shia UNC-i sorkar telemtetba anema longkak aiter.