UNC-i Modi dang Naga yimten ken o tekaraba nung bentettsü ajungshir

Tsüklai 02, 2018 (Agencies): United Naga Council (UNC) ajanga India Ato Kilonser Narendra Modi dang Indo-Naga yimten ken o tekeraba nung bentettsü asoshi memorandum ka agütsüogo. UNC-i iba memorandum ya Aenjeti 30 nung agütsü.
Iba representation nung Naga nunger taginüba aser tejangraba ajak keta lir, ta iba memorandum nung UNC ajanga shia lir aser Indo-Naga yimten tebilemtsü atema tatembang solution ka tekeraba nung bener arutsütsü asoshi Ato Kilonser dang nenshia ashi.
Naga political movement ajanga nisung taküm aser rongsen tsütsü takoksa tulu agütsüogo, ta UNC indang memorandum nung shia lir.
Naga nunger ajunga sarasadema, tesüngjem aser teimla tulu nung iba otsüsütsü Indo-Naga Framework Agreement ya Naga nunger puti otsü aser tensa den apet tatembang kati bener arutsüla aser tasa balala yanglua Government of India-i iba ken o atsülangtsü mechi election magitsüla, ta UNC ajanga ashir.
Ato Kilonseri Luroi 3, 2015 nung otsüsütsü Indo-Naga Framework Agreement sing sütepba ajanga Naga nüburtemi pa lenisüba nung iba tebilemtsü koktettsü südi, ta amanger, saka Government of India-i ken o tali atsülangtsü sentong yangluba ajanga nüburtem tatasaba agimatagi, ta UNC ajangasa ashi.
“Iba ken o tali atsülangba ajanga Government of India mesüra Naga nungertem majangzüktsü,” ta UNC-isa ashi.
Government of India aser Naga nunger ajungai akhumtsübua agizüktettsüa tekeratiba nung political settlement bener arutsü mechi Ato Kilonseri süoki ia bilemmdanga Nagaland State Assembly election agitsü lemteta aliba ya agientsüla, ta UNC-i ashi.
Kasa mapang Core Committee of Nagaland Tribal Hohos and Civil Organizations (CCNTHCO) ajanga telemtetba agiba nung onoki busema nokdaker, ta UNC tir, Gaidon Kamei-i ashi.
“Naga yimten tebilemtsü atema Naga nungertem longjemer nokdaktsü tang mapang tetemsü lir,” ta Kamei-i shisem.