UNC lenir ana anema tim inyaktsü: Ibobi

Imphal, November 26 (Agencies): Honibarnü Manipur Chief Minister, Okram Ibobi Singh-i, United Naga Council (UNC) Tir, Gaidon Kamei aser Information Secretary, S. Stephen na anema ozüng dak apetba tim inyaktsü, ta metetdaktsü.
“UNC lenir ana dak sentakba ken o inyakyim tenzükogo; telatetba kecha makai tena chioktsü makok,” ta Ibobi-i ashi.
Sorkari district tasen ana tentettsü sentong aliba anema UNC-i November 1 nü nungi longkak ait tenzüka mapang telatet kecha makai rongsenkettsüng lenmang mokdangdar.
UNC lenir ana ya Hokolbarnü police-i apuba sülen UNC aser Naga nunger tentettemi, lenir anaprong telatetba kecha makai chioktsüla, mesüra National Highway anaprong khenyongi mokdangtsü ta amokmerenba sülen tanü Chief minister-i iba o jembiogo.
Manipur Chief Minister-isa, UNC nung tanga züngsemtema aputsü bushidar, ta ashi.
Ibobi-isa, “Hokolbarnü truck aser totzü abenba tankers gari 400 jungnüa nung Assam nungi khu balala Manipur-i bener aruogo, aser iba tensa ya tekaraba nung süngjemtsü,” ta metetdaktsü.
Naga lenirtemi, Sardar Hills nung district tasen ana tentettsü benokba anema longkak aitbaji yimtenren onük ka lir, anungji UNC züngsem ana apubaji tim masü, ta ashi.
Ketdangsertemi ashiba agi, mokdangba dak sentakba nung Supreme Court tetuyubatem kübok UNC lenir ana anema ken o benoker.
Hokolbarnü Manipur High Court-i sorkar dang highway anaprong nung gari sademsadema senzütsüsa inyakang ta tuyua liasü. Iba tetuyuba sülen Chief Secretary, Oinam Nabakishore aser DGP, L. M. Khoute nati mera agia inyak tenzükogo.
Ano külen ketdangsertemibo, UNC aser All Naga Students’ Association Manipur-i longkak tesashiba aittsü südi ta bilemdar.