UNC ya ozüngi memelaba tentet ta sangdongtsü atema akhangtsü

Imphal/New Delhi, January 28 (Agencies): Hokolbarnü Congress otongdar, Kh Joykishan Singh-i, state sorkari Centre dang, United Naga Council (UNC) ya ozüngi memelaba tentet ka lir ta sangdongtsü atema mepishitsü renema lir, ta metetdaktsü.
Imphal nung Congress Bhavan nung osangbenertem den jembidang Singh-i, UNC-i ayonga rongsenkettsüng lenmang mokdangba ajanga Manipur nung osettsüset/chiyungtsü agi anünger, ta ashi.
UNC-i NH mokdanger yashi tashi nung anogo 87 jungogo. UNC-i, state sorkari district tasen tenet tentetba ajanga akhidang nungi Naga nunger li lemdangtsü, ta shia UNC-i longkak aiter.
Centre-i Manipur tensa sendoka yutsür ta aija Joykishan-i, UNC ji ozüngi memelaba tentet ka ta sangdongtsü atema BJP state unit-ia pusemtsü, ta ashi.
Iba dak sentakba nung Joykishan-i Centre dang telangzüba tejangja agüjang ta takhangba agütsüogo.
NH mokdangba atema Manipur CM-i kecha meinyaker: Javadekar
Manipur nung Congress sorkar tashi maitba ajanga state nung tang tashi rogsenkettsüng lenmang mokdanger, ta aija tanü Union Minister, Prakash Javadekar-i, Centre-i teyari agütsüsemaka iba onük bentettsü atema Chief Minister, Ibobi Singh-i pa teinyaktsü meinyaker, ta ashi.
“October 30 nungi mokdangbaji Chief Minister Ibobi Singh aser Congress party tashimaitba ajanga lir. Mokdangba ya state sorkari, state sorkar atema aser state sorkar indang, kechiyong iba ya ajanga yimtenren nung parnok tajangzük angutsü ta parnoki bilemer,” ta Union minister-isa aitsü.
Paisa ashiba agi, Centre-i state sorkar nem Assam Rifles densema paramilitary sepai company noklangka jungnüa aser security sepai 10,000 agütsüogo, saka Chief Minister-i iba mokdang agientsü atema item sepai mamshii barracks-i meyipa yoker.
“Iba ya kanga sendoka yutsüba ka lir. Nüburtemi pa dang tatishitsü ka sayutsü,” ta Manipur nung BJP incharge, Javadekar-isa ashi.