Under-18 Futsal tournament tenzükogo

Noksa nung Parliamentary Secretary tem Khekaho Assumi, Kriehu Liezietsu aser Managing Director NE  United Football Club Randeep nunger.

Dimapur, March 26 (TYO): Chekiye yimtsüng nung aliba A1 Powerplay arena nung Under-18 Futsal Tournament Deobarnü tenzükogo. Nagaland nung ‘artificial turf’ nung futsal asayaba tournament ibai mezüng asütsü aser iba asayamung ya Parliamentary Secretary, Sports & Youth Resources, Khekaho Assumi-i lapoktsü.
Iba asayamung ya A1 Powerplay aser Nagaland Youth Resources & Sports department külemi ayongzükba lir.
“Asaya nung tajungtiba akümtsü asoshi mapang aser arishi küm shitak nung tenzüktsüla. Aser asaya balala nung sempet aketertem bushiteta tesayuba agütsütsü,” ta Khekaho-i iba asayamung nung tajungshi o jembiba mapang ashi.
“Khelo India ya linük nung saisapong ajungkettsü asoshi lir aser Niti Aayog ajanga iba sentong agizükba sülen state nunga saisapong asoshi kiojen yangluba, coaching camp, tesayuba balala agütsüba aser seminar balala agütsüba nung terenlok alitsü. Khelo India indang scheme ya mapa küma aoba sülen senotsü teyaritem ajak nem kasa lemzüktsütsü,” ta paisa ashi.
State nung aliba lanurtem dak football asayatsü tejangraba arudakja aser sempet bushiteta tesayuba agütsütsü asoshi North East United Football Club ajanga mapa tajung inyakba asoshi, Parliamentary Secretary-i pelaba shisem.
Yimjung aser Futsal Football Nagaland nung tali ajungkettsü mechi, Young Naga Personalities aser Western Sumi Student nung lenirtem ‘exhibition match’ ka asaya. Iba asayamung lapokba sentong nung MTF & Lotteries indang Parliamentary Secretary, Kriehu Liezitsu aser department nung ketdangsürtem arua aden.
Under-18 Futsal Tournament nung asayatsü aoshi telok 16 tenüng züluoka lir.