UNDP-i state general election nung tokteptsü sangdongogo

Dimapur, June 15 (TYO): Brihostibarnü United Naga Democratic Party (UNDP)-i taruba küm Nagaland state general election nung tokteptsü, ta sangdongogo.
Tanü Indian Guest House building, Purana bazaar, Dimapur nung UNDP office semzükba sentong nung Party ketdangpurtemi iba osangji metetdakja liasü.
Maneni party-isa, ajaki agizüktettsüsa Naga yimtenren latettsü asoshi tang India sorkar aser Naga nunger lenirtem tsüngda yimjung ken o jembiba maparen nungiter, koba ajanga Naga nunger nem yimjung aser azükaru bener arutsütsü, ta metetdaktsü.
UNDP Tir, Hotongse-ia, party ketdangpurtemi pa dang tamang kateta Tir menden agütsüba atema pelaba lemsatep.
Iba sentong nung jembidang pai, yimtenren nung nübo tasen kati yimtenren anitsüji tezüba masü, party ka renloktsü atema ajak longjemer inyaktsüla, ta metetdaktsü.
Paisa, party tejakleni otettsü atema ajaki tebilemba onük tajung benoktsü mepishia liasü.
Tanep Rev. Tsipise Sangtam-i office meshiteta sarasademtsü aser iba party tenteter züngsem asem (asürtem) bilemteta liasü.
Küm pongu atema June 11, 2017 nü party ketdangpur tasen shima liasü.
Ketdangpurtemji Tir, H. Hotongse Sangtam leniba nung tatong Tir ana- T Wati Jamir, Renpen Ngullie na, general secretary- Dr. A. Imti Jamir, finance secretary- K. Mar Lemtur, Info & Pub. Secy, Michael Sangtam, treasurer, Robert Y Kikon aser Youth wing Tir Temsu Walling nunger lir.
Regional party, UNDP ya 2008 küm Wokha nung tenteta liasü. Iba party ya Election Commission of India-i agizükogo.