UN’er Syria Envoy, Mistura-i Syria semdanger

Damascus, February 16 (Agencies): United Nations (UN)’er Syria envoy, Staffan de Mistura-i Damascus semdanga Syria Foreign Minister, Walid al-Moualem den tanü, Mongolbar nü senden ka amenba osang ka Syria sorkar ketdangser kati metetdaktsüogo.
Syria Tir, Bashar al-Assad-i aniba Syria sorkar aser sorkar anemer na tsüngda mangatettep adoka küm 5 shi tongpang kanga sashia raraba anenja par linük nung yimji yimjung lidaktsütsü asoshi mangatettep adokba telok ana tsüngda yimjung tezüngzüktep agitsü ajungshitsü atema Mistura-i mapang jilia osang memetetdaktsüi tan Syria semdanger lir.
UN den yaritepa, International Syria Support Group (ISSG)-i ayonger külen Switzerland kübok Geneva yimti nung Syria yimjung senden ka taoba hopta amen saka Russia o Syria mitkar nati Syria nung amakba maparen kanga sashia inyakba ajanga iba sendenji tan February ita 25 nü nungi ang tanaben menshitsü lemteta liasü.
Ano, Syria nung tongpang rarabaren anentsü aser timtem toushi ajurua alir nüburtem nem nungdakba teyari osettsüset tongtsütsü melatsü ajungshitsü nükjidong nung US o Russia nati ayonger ISSG telokisa Germany kübok Munich yimti nunga taoba Hokolbar nü Syria den sentakba tongti senden ka amenba osang jangjaogo.
Aji oda, Geneva nung tan February ita 25 nü nungi tenzüka amentsü ayongba yimjung senden takok ngudaktsütsü tajungshiba olen ka Mistura-i tanü Walid den senden amendang lemsatepa liasü.
Ano külen, Kurd sepaitemi nungitba Syria sorkar mitkartemi Aleppo yimti aser Turkey arrtsü na tsüngda densemba tesemtem Islamic State (IS) kiralongrar telok aser Syria sorkar anemer ket nungi tanaben agishitsü mapatong kanga sashia tenzükba ajanga Geneva sendenji tamakok nung tembangtsüsa Syria nung tensa mejungi kümdaktsütsü tenzüka lir.