UNGA nung Sushma Swaraj-i Pakistan maksütsü

New York, September 26 (Agencies): Hombarnü New York nung India External affairs minister, Sushma Swaraj-i Pakistan Ato kilonser, Nawaz Sharif-i UN General Assembly nung Kashmir onük nung Idnia aitsüba o meyipja Pakistan maksütsüogo.

Pakistan linük ya alimai snetoktsüla ta ayongüzka Sushma Swaraj-i, “Kiralongrartem aniteter aser adodaktsür linüktemjibo linüktem rongnung adentsü temsüa mali,” ta ashi.

71buba UNGA senden nung minute 20 jungnüa onük jembidang Sushma-i, “Asenok rongnung tang tashi kiralongraba o jembir linüktem lir, aser panoki kiralongrartemi aniteter aser adokdakja prokshir. Kiralongrartem jenokdaktsütsüji parnok maitsü ka kümogo. Asenoki item linüktemji jangjatsüla,” ta ashi.

“Kiralongrartem sademsadema senzüdak ta UN-i ajaba linüktemi tesempa o proker, aser parnokjia parnoki anitetba kiralongrartem den kasa lir. Item ama linüktemji linüktem rongnung adentsü temsüa mali,” ta lai ashi.

“26/11 aser Uri amakba kiralongrar telokji alima esem ajaklen kiralongraba nunga densema lir,” ta shia lia item ama linüktem sentoktsüla, ta ashi.

Pakistan Ato kilonser, Sharif-i UNGA sabang nungi Kashmir nung meimchir temeten anema inyakba mapatem indang jambiba dak sentakba nung Swaraj-i, “Meimchir teemeten anema inyaker ta tai tongloktsürtem jagi peisasa meyipa reprangdangtsüka aser Balochistan densema peilinük nung kanga mejungi inyakba mapatem reprangtsüla. Baloch nüburtem dak benshiba mapatemji linüki tamajungtiba inyakba lir,” ta ashi.

Hindi oshi nung Swaraj-i, Ato kilonser, 2014 May ita nung Narendra Modi-i Pakistan den temba yima pa tenangzükba agiba sentong nung Nawaz Sharif jaoka liasü aser taoba December ita nunga pai Lahore semdangogo, ta ashi.

“Ajisüaka iba atemaji onoki keci meyipa angu? Pathankot, Uri (kiralongrartemi amakba tesemtem), Bahadur Ali (Pakistan kiralongrar apuba),” ta lai ashi.

“Bahadur Ali, shiba Jammu & Kashmir nung puogo, pa ya Pakistan-i arrtsü adena kiralongraba tatishitsü lir,” t alai ashi.

“Kashmir ya India shilem ka lir aser India shilemsa asütsü. Shingaia tashiyim agi iba ya agitsü makok,” ta laisa ashi.