Ungma Aonglenden nung NDPP lokti senden agi

Ungma (Mkg), Tsüklai 19 (TYO): Nationalist Democratic Progressive Party (NDPP) Mokokchung Region-i Tentonü Ungma Aonglenden nung public rally sentong tulu ka ayongzüka liogo. Iba sentong nung NDPP chief minister candidate aser taoba Nagaland Chief Minister aser MP, Neiphiu Rio den NDPP tir Chingwang Konyak aser lenla balala nung tanishir aser party pur aika adenshia longsoa kaogo.
Tanü Neiphiu Rio-i jembidang, pa chief minister menden toktsüba sülen tanishir tajung maliba ajanga küm pezü tashi nübur atema kecha meinyaki menden raktepba, tashi raktepba, teraksa agi dang sünger aliba ngua, asen lima iba amai dang ora tia majungtsü ta sür party tasen NDPP ya tentetba lir, ta ashi.
T.R Zeliang-i aniba sorkari nübur nem tagütsütsü tim magütsüteter, kaketshir meyong scholarship junga magütsür, itasen junga magütsüteter, iba den ano ULB election dak sendakba nung telemtetba tajung magiteti azü tokshi aser kiojen aika lalu aser arogo-a ashioktsü, ta kuli kar ashi. “Iba ama mangdang makaba, taotsü tim leni maoba, tiazü lenir kati kodanga alima junga manitsü aser joko nüburtemi pa dak tamang makar”, ta Rio-isa aitsü.
NDPP ya tashi ita aoba party ka lir ta ngua BJP-i NDPP den pre-poll alliance yangluba lir, ta paisa ashi. BJP den alliance yanglubaji tongtibangsa parnok den tembar yima terenlok mapa külemi inyaktsü atema lir, aji oda, Congress yimsüsüba mapang nunga yamaji külemi inyaka aruogo, ta paisa jangjashitsü.
Paisa iba dak sendakba nung ashidang, “India ya secular state ka lir, pei yimsüyimpong, pei sobaliba, pei tamangba yimsü benshitsü asoshi temzüng nung jangja-jangja shia lir, anungji, kecha teratatsü aser tetsübutsü kecha mali”, ta paisa jangjashitsü.
NDPP ya recognized party ka masü ta aikati rata alitsü akok, aji saka, “party tejen kati dang sorkarji akümtsü tabo zülua maka”, ta paisa jangjashitsü. Tsüngremer sentong süra NDPP-i sorkar kümer külen taoba sorkari raksar aliba mapa ajakji yangluyonga aotsü, anungji, nüburtemi NDPP nem vote agütsütsü asoshi paisa ayongzük.
Iba sentong nung NDPP tir Chingwang-i jembidang, tangba election yabo akhi ama teratatsü kecha mali, kechiyong taruba sorkarjibo BJP den lungjemer NDPP-i aniba sorkar akümtsü, ta ashi. NDPP ya tanga party ka ama masütsü, kechiyong iba party yagi maparen ajak nung ochi shia inyaktsü aser temzüng akhümtsübua mapa ajak inyaktsü, ta paisa metetdaktsü.
Sentong nung NDPP Mokokchung Region tir, N.Bendang Jamir menden liasü. NDPP Working President Alemtemshi Jamir, 26 Aonglenden NDPP candidate Imtikumzuk aser Lipokzülu Longkumer Tatar parnokia mapang tatsütsü agia jembi.