Ungma arogoi Primary Health Centre nung atsü yanglutsü

Ungma, June 2 (TYO): Ungma Baptist Arogoi Primary Health Centre Ungma nung merang atsü (security fencing) den kirtangtsü (main gate) yanglutsüba meshitetba sentong ka Brihostibarnü yangi PHC Ungma nung agiogo. Tanü iba fencing aser gate-ji Ungma Baptist Arogo pastor, Rev. Dr. Noklen den meshiteta sarasademer lapoktsü.
Iba sentong nung medical department nungi ketdangsertem, Ungma putu yimsüsür, Arogo tenmzükertem, Soyim Medical Staff Association, Health Care Management Committee Ungma aser PHC Ungma nung inyakertem densema liasü.
Tanü iba sentong nung Mokokchung Dy. Chief Medical Officer, Kibangkümbai tayongzükba o jembidang, Ungma nungeri ‘communitization policy’ angateta iba ama tejakleni arua shilem tajung agiba asoshi department tenüng nung pelaba metetdaktsü.
Asen lima ‘communitization’ maparen tenzüker küm 20 shi arur, joko ajaki iba nükjidong (policy)-ji meteta lir, aji saka, “mapa küma meinyaker”, ta paisa ashi. Aji oda, Ungma nungeri iba nükjidong angateta shilem agiba ama Nagaland tesem aika nung mali aser iba yagi tatishitsü tulu sayur, ta pai ashi.
Iba PHC ya yimertem tajangzük agitsü atema lapokba lir, anungji, iba nükjidongji angateta “yimertemi ibai ano tajungtiba ketdang süa bener odaktsüner”, ta paisa inyakdaktsünüba olen ka shisem.
Sorkar sensakba agi tanü department nung nüngdakbatem aika mangur, anungji, asenoki “sorkar dak dang meimlali lokti ajaki iba amai tejakleni arua shilem tajung agitsüla”, ta paisa ayongzük.
Tanü Nagaland nung dang masü saka India ajunga nung doctor ajema lir, aji oda, state sorkari doctor post tasen meyanglur, iyongji lanurtem aikati asen lima arua mapa inyaktsü mejangrar. Doctor ajema aliba ajanga talisa tezülen alirtembo lenmang aisü nung timtem ajurudagi, ta paisa kuli kar dena ashi.
Tanü asenok azümesenba ajanga pressure, temulungjang, shini aser stroke amala tashidaktem kanga bulua kümdagi, ta paisa nüburtem kümdanga alitsü olen ka metetdaktsü.
Nagaland tesem aika nung temelen/meyonger (proxy) yokba mapa ya kanga bulua kümdagi, anungji, “iba yimya tamajung anema asen Ao kini anir temelenshi ka bener arutsüdi arung”, ta paisa tayongzükba ka agütsü.
PHC Ungma nung nüngdakba ajiteta Ungma yimteni Computer & Printer, Ungma Arogoi main gate & security fencing, Mongküm Jamiri Microscope, K.Bendangtoshi Imsongi Refrigerator, Tsüknungmeren Tatar-i table, Imlikokba Tatar-i chairs, ta tenla balala agütsüba asoshi PHC Ungma Medical Officer Dr. Sentiyenlai pelaba lemsatep.
Ungma PHC ya 1968 nung Sub-Centre ka ama tenzüka arur 1997 kümto PHC jenjang ajungket. Kümshi nütsüng renloker asünung Ungma PHC nung ya doctor temeja ka nüngdakba indang yimsüsürtemi dept ketdangser dang shia liasü. Iba centre ya tenzüker lokti balala den kija aser kibongtemi nüngdakbatem ajiteta tenla balala agüja arua liasü.